മാധ്യമങ്ങളും രാഷ്ട്രീയ എതിരാളികളും പാര്‍ട്ടിക്കെതിരെ കടന്നാക്രമണം നടത്തുകയാണെന്നാരോപിച്ച് സിപിഎം ജില്ലാ കമ്മിറ്റി രംഗത്ത്. പിഎസ്‍സി കോഴ ആരോപണത്തിൽ സിപിഎം നേതാവ് പ്രമോദ് കോട്ടൂളിക്കെതിരെ നടപടിയെടുത്തതിന് പിന്നാലെയാണ് പാർട്ടിക്കെതിരെ കടന്നാക്രമണം നടക്കുന്നത്. ഇതിനെ ചെറുത്ത് തോൽപ്പിക്കുമെന്നും ഈ പ്രചരണങ്ങളുടെ അജണ്ട പാര്‍ട്ടി തുറന്നു കാണിക്കുമെന്നും സിപിഎം ജില്ലാ കമ്മിറ്റി അറിയിച്ചു.
സഖാക്കള്‍ക്കെതിരെയുള്ള അച്ചടക്ക നടപടി തിരുത്തല്‍ പ്രക്രിയയുടെ ഭാഗമാണെന്നും സിപിഎം ജില്ലാ കമ്മിറ്റി വ്യക്തമാക്കുന്നു. പാര്‍ട്ടിയെയും നേതൃത്വത്തെയും കരിവാരിത്തേക്കാന്‍ ഈ അവസരത്തെ ഉപയോഗിക്കുകയാണെന്നും മാധ്യമങ്ങളും മുന്‍കാലങ്ങളില്‍ നിന്ന് പാര്‍ട്ടിയില്‍ നിന്നും പുറത്തായവരും ഈ അവസരത്തെ ഉപയോഗിക്കുകയാണെന്നും സിപിഎം ജില്ലാ കമ്മിറ്റി കുറ്റപ്പെടുത്തി.
എളമരം കരീമിനും മുഹമ്മദ് റിയാസിനും ജില്ലാ നേതൃത്വത്തിനുമെതിരെ നടക്കുന്നത് നീചമായ ആക്രമണമാണെന്നും സിപിഎം ജില്ലാ കമ്മിറ്റി കുറ്റപ്പെടുത്തി. ഈ പ്രചരണങ്ങളുടെ അജണ്ട പാര്‍ട്ടി തുറന്നു കാണിക്കുമെന്നും ജില്ലാ കമ്മിറ്റി അറിയിച്ചു. അതേസമയം തെറ്റ് ചെയ്തതിന്റെ പേരില്‍ നടപടിക്ക് വിധേയരാകുന്നവര്‍ക്ക് വീരപരിവേഷം നല്‍കുന്ന രീതി മാധ്യമങ്ങളും എതിരാളികളും നേരത്തെയും സ്വീകരിക്കുന്നതാണെന്നും ജില്ലാ കമ്മിറ്റി കുറ്റപ്പെടുത്തി.