കണ്ണൂർ എഡിഎം നവീൻ ബാബുവിൻ്റെ മരണത്തിൽ പി പി ദിവ്യക്കെതിരായ പൊലീസ് അന്വേഷണം കൃത്യമെന്ന് സിപിഎം സംസ്ഥാന സെക്രട്ടറി എം വി ഗോവിന്ദൻ. അന്വേഷണത്തിൽ ഒരു വീഴ്‌ചയുമില്ലെന്നും പൊലീസിൻ്റെ അന്വേഷണം കൃത്യമായി മുന്നോട്ട് പോകുമെന്നും എം വി ഗോവിന്ദൻ പറഞ്ഞു.
ജാമ്യം സംബന്ധിച്ചുള്ള പ്രധാനപ്പെട്ട വാദം വ്യാഴാഴ്ച നടന്നുവെന്നും വിഷയത്തിൽ വിധി വരട്ടെയെന്നും എം വി ഗോവിന്ദൻ പറഞ്ഞു. പാർട്ടി കുടുംബത്തിനൊപ്പമാണെന്ന് നേരത്തെ വ്യക്തമാക്കിയതാണ്. ഇക്കാര്യത്തിൽ ഒരു വിട്ടുവീഴ്ചയ്ക്കും തയ്യാറാവില്ലെന്നും എം.വി ഗോവിന്ദൻ പറഞ്ഞു.
അതേസമയം പാലക്കാട് ഉപതിരഞ്ഞെടുപ്പുമായി ബന്ധപ്പെട്ട് കോൺഗ്രസിന്റെ അകത്തുതന്നെ വൈരുദ്ധ്യങ്ങളുണ്ടെന്നും എം വി ഗോവിന്ദൻ പറഞ്ഞു. ഒരുപാട് പേർ കോൺഗ്രസ് വിട്ടു. അവരെല്ലാം പൂർണമായി എൽ.ഡി.എഫിന് വോട്ട് ചെയ്യുമെന്ന് കരുതുന്നില്ല. എന്നാൽ, അതിൽ ഒരുവിഭാഗം ഇടതുപക്ഷത്തോടൊപ്പം നിന്നാൽ കോൺഗ്രസിനേയും ബിജെപിയേയും തോൽപ്പിക്കാനാകുമെന്നും എംവി ഗോവിന്ദൻ കൂട്ടിച്ചേർത്തു.