വയനാട്ടിലെ ദുരന്തമേഖല കാണാന്‍ പ്രധാനമന്ത്രി നരേന്ദ്രമോദി എത്തിയത് പ്രതീക്ഷയോടെയാണ് കേരളം കാണുന്നതെന്ന് സിപിഎം സംസ്ഥാന സെക്രട്ടറി എം വി ഗോവിന്ദന്‍ പറഞ്ഞു. അര്‍ഹിക്കുന്ന സഹായം കേന്ദ്രം നല്‍കുമെന്നാണ് പ്രതീക്ഷ.
അനേകമാളുകള്‍ മരിക്കുകയും ഒരു നാടുതന്നെ ഇല്ലാതാകുകയുംചെയ്ത വയനാടിനെ ചേര്‍ത്തുപിടിക്കാന്‍ ലോകമാകെ കൈകോര്‍ത്തപ്പോള്‍ കണ്ടില്ലെന്നു നടിക്കാനാകാത്ത സാഹചര്യത്തിലാണ് പ്രധാനമന്ത്രി എത്തിയത്. മറ്റൊരു സംസ്ഥാനത്താണ് ഇത്തരമൊരു ദുരന്തം നടന്നതെങ്കില്‍ അര്‍ഹിക്കുന്നതിലേറെ സഹായം ആദ്യമേ പ്രഖ്യാപിക്കുമായിരുന്നു.
പ്രധാനമന്ത്രി വയനാട്ടിലെത്തിയ ദിവസംതന്നെ സഹായ പ്രഖ്യാപനമുണ്ടാകുമെന്നാണ് എല്ലാവരും പ്രതീക്ഷിച്ചത്. രാഷ്ട്രീയം മറന്ന് വയനാടിനെ ചേര്‍ത്തുപിടിക്കാന്‍ ഒന്നിച്ചുനില്‍ക്കണം. മുന്‍വിധിയില്ലാതെ കേന്ദ്രവും സഹായിക്കുമെന്നാണ് കരുതുന്നതെന്നും എം വി ഗോവിന്ദന്‍ പറഞ്ഞു.