എസ്.എസ്.എല്‍.സി ഫലം ഇന്ന് പ്രഖ്യാപിക്കും

സംസ്ഥാനത്തെ എസ്എസ്എല്‍സി പരീക്ഷാ ഫലം ഇന്ന് പ്രഖ്യാപിക്കും. ഉച്ചകഴിഞ്ഞ് മൂന്ന് മണിക്ക് പിആര്‍ഡി ചേംബറില്‍ വച്ച് വിദ്യാഭ്യാസമന്ത്രി വി ശിവന്‍കുട്ടിയാണ് ഫല പ്രഖ്യാപനം നടത്തുക. ശേഷം ഔദ്യോഗിക വെബ്‌സൈറ്റുകളിലൂടെ വിദ്യാര്‍ത്ഥികള്‍ക്ക് ഫലം പരിശോധിക്കാന്‍ കഴിയും.

പരീക്ഷകള്‍ പൂര്‍ത്തിയായി ഒന്നര മാസത്തിന് ശേഷമാണ് ഫലപ്രഖ്യാപനം നടക്കുന്നത്. ഇതിനായുള്ള ഒരുക്കങ്ങള്‍ എല്ലാം പൂര്‍ത്തിയായതായി വിദ്യാഭ്യാസ വകുപ്പ് അറിയിച്ചു. keralaresults.nic.in, dhsekerala.gov.in,www.keralapareekshabhavan.in,  kerala.gov.in, keralaresults.nic.in, results.itschool.gov.in, cdit.org, prd.kerala.gov.in, results.nic.in, educationkerala.gov.in, examresults.net/kerala  എന്നീ വെബ്സൈറ്റുകളില്‍ വിദ്യാര്‍ത്ഥികള്‍ക്ക് എസ്എസ്എല്‍സി ഫലം പരിശോധിക്കാം.

മാര്‍ക്ക്ലിസ്റ്റ് ഡൗണ്‍ലോഡ് ചെയ്യാനും സാധിക്കും. കൈറ്റ് പുറത്തിറക്കിയ സഫലം 2022′ എന്ന മൊബൈല്‍ ആപ്പ് വഴിയും ഫലമറിയാം.എസ്എസ്എല്‍സി പരീക്ഷയില്‍ ഇതുവരെയുള്ളതില്‍ ഏറ്റവും വലിയ വിജയശതമാനമായിരുന്നു കഴിഞ്ഞ വര്‍ഷം ഉണ്ടായത്. 99.47 ആയിരുന്നു വിജയശതമാനം. ഇത്തവണയും അത് ആവര്‍ത്തിക്കുമോ എന്നാണ് എല്ലാവരും ഉറ്റുനോക്കുന്നത്.

ഇതോടൊപ്പം ടി.എച്ച്.എസ്.എല്‍.സി, (ഹിയറിങ് ഇംപേര്‍ഡ്), എസ്.എസ്.എല്‍.സി (ഹിയറിങ് ഇംപേര്‍ഡ്), എ.എച്ച്.എസ്.എല്‍.സി പരീക്ഷകളുടെ ഫലവും പ്രഖ്യാപിക്കും. മാര്‍ച്ച് 31 മുതല്‍ ഏപ്രില്‍ 29 വരെയായിരുന്നു എസ്എസ്എല്‍സി പരീക്ഷ. 4,27407 വിദ്യാര്‍ഥികളാണ് റെഗുലര്‍, പ്രൈവറ്റ് മേഖലകളിലായി എസ്എസ്എല്‍സി പരീക്ഷ എഴുതിയത്.