തൃശൂരില്‍ പ്രായപൂര്‍ത്തിയാകാത്ത പെണ്‍കുട്ടിയെ ലൈംഗികമായി പീഡിപ്പിച്ച സംഭവത്തില്‍ എസ്‌ഐ അറസ്റ്റില്‍. ഗ്രേഡ് എസ്‌ഐ ചന്ദ്രശേഖരന്‍ ആണ് കേസില്‍ പൊലീസ് കസ്റ്റഡിയിലുള്ളത്. രണ്ട് വര്‍ഷം മുന്‍പ് ആണ് കേസിന് ആസ്പദമായ സംഭവം നടന്നത്. സ്റ്റുഡന്റ് പൊലീസ് കേഡറ്റായ വിദ്യാര്‍ത്ഥിനിയെ പീഡിപ്പിച്ചെന്നായിരുന്നു പരാതി.
രണ്ട് വര്‍ഷം മുമ്പ് ചാപ്പാറ വിനോദ സഞ്ചാര കേന്ദ്രത്തിന് സമീപത്ത് കാറില്‍ വച്ച് പ്രതി പെണ്‍കുട്ടിയെ പീഡിപ്പിക്കുകയായിരുന്നു. കൗണ്‍സിലിംഗിനിടെ പെണ്‍കുട്ടി നടത്തിയ വെളിപ്പെടുത്തലാണ് പൊലീസ് ഉദ്യോഗസ്ഥന്റെ അറസ്റ്റിലേക്ക് നയിച്ചത്. സംഭവം നടക്കുമ്പോള്‍ ഒന്‍പതാം ക്ലാസ് വിദ്യാര്‍ത്ഥിനിയായിരുന്ന പെണ്‍കുട്ടി ഇന്ന് പ്ലസ് വണ്‍ വിദ്യാര്‍ത്ഥിനിയാണ്.
വിദ്യാര്‍ത്ഥിനി കൗണ്‍സിലിംഗിനിടെ നടത്തിയ വെളിപ്പെടുത്തലിന് പിന്നാലെ സംഭവത്തില്‍ തൃശൂര്‍ റൂറല്‍ വനിതാ പൊലീസ് കേസെടുത്തിരുന്നു. ഇതേ തുടര്‍ന്നാണ് ഗ്രേഡ് എസ്‌ഐ ചന്ദ്രശേഖരനെ കസ്റ്റഡിയിലെടുത്തത്. ഇയാളുടെ മൊഴി രേഖപ്പെടുത്തും. വൈദ്യ പരിശോധനക്ക് ശേഷം അറസ്റ്റ് രേഖപ്പെടുത്തി കോടതിയില്‍ ഹാജരാക്കുമെന്നാണ് റിപ്പോര്‍ട്ടുകള്‍.