ദുബായിലെ മലയാളി മാധ്യമ പ്രവര്‍ത്തകന്‍ എല്‍വിസ് ചുമ്മാറിന് യുഎഇ സർക്കാരിന്റെ പത്തു വര്‍ഷത്തെ ഗോള്‍ഡണ്‍ വിസ ലഭിച്ചു. ഇന്ത്യ ആസ്ഥാനമായ വാര്‍ത്താ മാധ്യമ സ്ഥാപനങ്ങളില്‍ നിന്നും പ്രത്യേകിച്ച് മലയാള മാധ്യമങ്ങളില്‍ നിന്നും ജേണലിസ്റ്റ് വിഭാഗത്തില്‍ ഗോള്‍ഡണ്‍ വിസ ലഭിക്കുന്നത് ഇത് ആദ്യമാണ്.
നേരത്തെ, യുഎഇയിലെ പ്രാദേശിക മാധ്യമങ്ങളിലെ വിദേശികളായ ജേണലിസ്റ്റുകള്‍ക്കാണ് ഗോള്‍ഡണ്‍ വിസ നല്‍കിയിരുന്നത്. കഴിഞ്ഞ 19 വര്‍ഷമായി യുഎഇയിലെ വിവിധ മലയാള മാധ്യമ സ്ഥാപനങ്ങളില്‍ ജോലി ചെയ്ത എല്‍വിസിന്, ഫോറിന്‍ ജേണലിസ്റ്റ് എന്ന വിഭാഗത്തിലാണ് ഈ അംഗീകാരം.
കഴിഞ്ഞ പതിമൂന്ന് വര്‍ഷത്തിലധികമായി, ദുബായില്‍ ജയ്ഹിന്ദ് ടി വി മിഡില്‍ ഈസ്റ്റിന്റെ വാര്‍ത്താ വിഭാഗം മേധാവിയായി ജോലി ചെയ്തു വരുകയാണ് തൃശൂർ സ്വദേശിയായ എല്‍വിസ്. നേരത്തെ, ദുബായ്, അബുദാബി, ഷാര്‍ജ സർക്കാരുകളുടെ പ്രശംസയും അവാര്‍ഡുകളും ഇദ്ദേഹം സ്വന്തമാക്കിയിട്ടുണ്ട്. വിവിധ മേഖലകളില്‍ മികവ് തെളിയിച്ച വിദേശികള്‍ക്കാണ് യുഎഇ, പത്തു വര്‍ഷത്തെ ദീര്‍ഘകാല താമസ വിസ നല്‍കുന്നത്.
Read more
ജനശ്രദ്ധ നേടിയ നിരവധി വാര്‍ത്താ റിപ്പോര്‍ട്ടുകള്‍ എല്‍വിസ് ചുമ്മാർ സംപ്രേഷണം ചെയ്തിട്ടുണ്ട്. മലയാള മനോരമ, ജീവൻ ടിവി ഉള്‍പ്പെടെ പ്രമുഖ മാധ്യമ സ്ഥാപനങ്ങളില്‍ ഇന്ത്യയിലും യുഎഇയിലുമായി എൽവിസ് ജോലി ചെയ്തിട്ടുണ്ട്. ഇരിങ്ങാലക്കുട ആളൂര്‍ കാരാത്രക്കാരന്‍ കെ കെ ജോസിന്റെ മകള്‍ ദീപയാണ് ഭാര്യ. ദുബായില്‍ സ്‌കൂള്‍ വിദ്യാര്‍ത്ഥികളായ എഡ്രിക് എല്‍വിസ് ചുമ്മാര്‍, എഡ്വിന്‍ എല്‍വിസ് ചുമ്മാര്‍ എന്നിവര്‍ മക്കളാണ്.
