കൊല്ലം കുണ്ടറയില്‍ കിണര്‍ വൃത്തിയാക്കുന്നതിനിടെ മണ്ണിടിഞ്ഞ് വീണ് അപകടം. മണ്ണിനടിയില്‍ കുടുങ്ങിയ തൊഴിലാളി മരിച്ചു. എഴുകോണ്‍ സ്വദേശി ഇരിമ്പനങ്ങാട് കൊച്ചു തുണ്ടില്‍ വീട്ടില്‍ ഗിരീഷ്‌കുമാര്‍ (47) ആണ് മരിച്ചത്.
ഇന്നലെ വൈകിട്ട് അഞ്ചരയോടെയായിരുന്നു അപകടം. പെരിനാട് വെള്ളിമണ്‍ ഹൈസ്‌കൂളിനു സമീപം സ്വകാര്യവ്യക്തിയുടെ കിണര്‍ വൃത്തിയാക്കാനാണ് ഗിരീഷ് കുമാറും കരാറുകാരനായ വെള്ളിമണ്‍ സ്വദേശി ഹരിയും എത്തിയത്. ഒന്നരയോടെ കിണര്‍ വൃത്തിയാക്കാന്‍ തുടങ്ങി. കിണര്‍ വൃത്തിയാക്കിയ ശേഷം തിരികെ കയറുന്നതിനിടെ തൊടി ഇടിഞ്ഞ് വീഴുകയായിരുന്നു.
തുടര്‍ന്ന് അഗ്നിശമന സേനാ യൂണിറ്റുകളും നാല് മണ്ണുമാന്തി യന്ത്രങ്ങളും എത്തിച്ച് രക്ഷാപ്രവര്‍ത്തനം നടത്തുകയായിരുന്നു. എട്ട് മണിക്കൂറിന് ശേഷമാണ് മൃതദേഹം പുറത്തെടുക്കാനായത്.