കേരള ഭാഗ്യക്കുറി തിരുവോണം ബമ്പര്‍ നറുക്കെടുപ്പ് ഇന്ന് നടക്കും. ഉച്ചകഴിഞ്ഞ് രണ്ടിന് ഗോര്‍ഖി ഭവനിലാണ് നറുക്കെടുപ്പ്. ബുധന്‍ രാവിലെ പത്തുവരെ ലോട്ടറി ഓഫീസുകളില്‍നിന്ന് ഏജന്റുമാര്‍ക്ക് ടിക്കറ്റ് വാങ്ങാം.
ബമ്പര്‍ ലോട്ടറി വില്‍പ്പനയില്‍ സര്‍വകാല റെക്കോഡാണ് ഈ വര്‍ഷം. ചൊവ്വ വൈകിട്ടുവരെ 75 ലക്ഷത്തോളം ടിക്കറ്റ് വിറ്റുപോയി. കഴിഞ്ഞ വര്‍ഷം 66.5 ലക്ഷം ടിക്കറ്റ് വിറ്റിരുന്നു. ഇത്തവണ 125.54 കോടി രൂപ സമ്മാനങ്ങള്‍ക്ക് നീക്കിവച്ചു. ഒന്നാം സമ്മാനം 25 കോടി. രണ്ടാം സമ്മാനം ഒരുകോടി രൂപവീതം 20 പേര്‍ക്ക്. മൂന്നാം സമ്മാനം 50 ലക്ഷംവീതം 20 നമ്പരുകള്‍ക്ക് നല്‍കും. നാലാം സമ്മാനം അഞ്ചുലക്ഷംവീതം 10 പേര്‍ക്കും, അഞ്ചാം സമ്മാനം രണ്ടുലക്ഷംവീതം 10 പേര്‍ക്കും നല്‍കും. 5000, 2000,1000, 500 രൂപയുടെ നിരവധി സമ്മാനങ്ങളുമുണ്ട്.
നറുക്കെടുപ്പ് കൈരളി ഉള്‍പ്പെടെ തെരഞ്ഞെടുത്ത ചാനലുകളിലും കേരള ലോട്ടറിയുടെ യുട്യൂബ് ചാനലിലും തത്സമയം കാണാം. ഔദ്യോഗിക വെബ്‌സൈറ്റായ keralalotteries.com, statelottery.kerala.gov.in എന്നിവയില്‍ ഫലം പ്രസിദ്ധീകരിക്കും.