വയനാട് ദുരന്തത്തിന്റെ പശ്ചാത്തലത്തില്‍ ഇത്തവണ തൃശൂരില്‍ പുലികളിയും കുമ്മാട്ടിക്കളിയും ഡിവിഷന്‍ തല ഓണാഘോഷവും ഇല്ല. സെപ്റ്റംബര്‍ 18ന് ആയിരുന്നു തൃശൂരില്‍ പുലികളി നടത്താന്‍ നിശ്ചയിച്ചിരുന്നത്. ഇന്ന് ചേര്‍ന്ന കോര്‍പ്പറേഷന്‍ സ്റ്റാന്‍ഡിംഗ് കമ്മിറ്റി, കക്ഷി നേതാക്കള്‍ എന്നിവരുടെ യോഗത്തിലാണ് ഈ വര്‍ഷത്തെ ആഘോഷം ഒഴിവാക്കാന്‍ തീരുമാനിച്ചത്.
അടുത്ത മാസം 16, 17 തീയതികളിലായിരുന്നു കുമ്മാട്ടിക്കളി തീരുമാനിച്ചിരുന്നത്. നേരത്തെ വയനാട് ദുരന്തത്തിന്റെ പശ്ചാത്തലത്തില്‍ സംസ്ഥാനത്ത് ഓണാഘോഷ പരിപാടികളും ചാമ്പ്യന്‍സ് ബോട്ട് ലീഗും ഒഴിവാക്കിയതായി ടൂറിസം-പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസ് അറിയിച്ചിരുന്നു.
വയനാട് ദുരന്തത്തെ തുടര്‍ന്ന് രക്ഷാപ്രവര്‍ത്തനവും പുനരധിവാസ പ്രവര്‍ത്തനങ്ങളും പുരോഗമിച്ച് കൊണ്ടിരിക്കുകയാണ്. വയനാട് സമാനതകളില്ലാത്ത ദുരന്തമാണ് അനുഭവിച്ചുകൊണ്ടിരിക്കുന്നത്. നൂറുകണക്കിന് പേര്‍ക്ക് ജീവന്‍ നഷ്ടമായി. ഈ സാഹചര്യത്തിലാണ് ആഘോഷങ്ങള്‍ ഒഴിവാക്കുന്നതെന്ന് മന്ത്രി വ്യക്തമാക്കിയിരുന്നു.