സംസ്ഥാനത്ത് വീണ്ടും ലഹരി വേട്ട. 100 ഗ്രാം എംഡിഎംഎയും ഒന്നര കിലോ കഞ്ചാവുമായി മൂന്ന് യുവാക്കൾ പിടിയിലായി. പൂജപ്പുര സ്വദേശി അര്‍ജ്ജുന്‍ (22), മേലാറന്നൂര്‍ സ്വദേശി വിമല്‍ രാജ് (22), ആര്യനാട് സ്വദേശി ഫക്തര്‍ ഫുല്‍ മുഹമ്മിന്‍ (25) എന്നിവരാണ് പിടിയിലായത്. തിരുവനന്തപുരം സിറ്റി ഡാന്‍സാഫ് ടീമും കഴക്കൂട്ടം പൊലീസും ചേർന്നാണ് ഇവരെ പിടികൂടിയത്.
ബെംഗളുരുവില്‍ നിന്നാണ് മൂവരും ലഹരി വസ്തുക്കൾ കടത്തിക്കൊണ്ടുവന്നത്. പുലർച്ചെ രാവിലെ തിരുവനന്തപുരത്തേയ്ക്ക് എത്തിയ ബെംഗളുരു-തിരുവനന്തപുരം ദീര്‍ഘദൂര ബസിൽ ലഹരിവസ്തുക്കള്‍ കടത്തിക്കൊണ്ടുവരികയായിരുന്നു യുവാക്കൾ. പൊലീസിന് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് മൂവരെയും പിടികൂടിയത്.
രഹസ്യവിവരത്തിന്റെ അടിസ്ഥാനത്തിൽ ഇവരെ പൊലീസ് യുവാക്കളെ നിരീക്ഷിച്ചു വരികയായിരുന്നു. ബെംഗളുരുവിലുണ്ടായിരുന്ന ഇവര്‍ മടങ്ങിയ വിവരം പൊലീസ് മനസ്സിലാക്കിയിരുന്നു. കഴക്കൂട്ടത്ത് ബസ് ഇറങ്ങി ബാഗുകളുമായി നടക്കവെയാണ് പൊലീസ് പരിശോധന നടത്തിയത്. തുടർന്ന് ലഹരിവസ്തുക്കളടക്കം മൂവരെയും അറസ്റ് ചെയ്തു. പിടികൂടിയ എംഡിഎംഎക്കും കഞ്ചാവിനും വിപണിയില്‍ മൂന്നര ലക്ഷത്തിലധികം രൂപ വിലയുണ്ട്.