തിരുവനന്തപുരത്ത് നിന്ന് മൂന്ന് സ്‌കൂള്‍ വിദ്യാര്‍ത്ഥിനികളെ കാണാനില്ലെന്ന് പരാതി. പട്ടം കേന്ദ്രീയ വിദ്യാലയത്തിലെ വിദ്യാര്‍ത്ഥിനികളെയാണ് കാണാതായതായി പരാതിയുള്ളത്. കാണാതായ മൂന്ന് പേരും ഒന്‍പതാം ക്ലാസ് വിദ്യാര്‍ത്ഥിനികളാണ്. ഭാഗ്യശ്രീ, ആര്യ, അനുശ്രീ എന്നിവരെയാണ് കാണാതായതായി പരാതിയുള്ളത്.
14 വയസുള്ള കുട്ടികളെയാണ് കാണാതായത്. മൂവരും 12.30ന് ആരംഭിക്കുന്ന ക്ലാസിനായി ബസിലെത്തിയ ശേഷം സ്‌കൂളില്‍ പ്രവേശിച്ചില്ലെന്നാണ് പുറത്തുവരുന്ന വിവരം. സ്‌കൂള്‍ ബസില്‍ എത്തിയ മൂവരും പട്ടത്ത് ഇറങ്ങിയതായി വിവരം ലഭിച്ചു. മൂവരും ക്ലാസില്‍ എത്താതിരുന്നതിനെ തുടര്‍ന്ന് അദ്ധ്യാപകര്‍ മാതാപിതാക്കളെ വിവരം അറിയിക്കുകയായിരുന്നു.
ഇതേ തുടര്‍ന്ന് രക്ഷിതാക്കള്‍ മെഡിക്കല്‍ കേളേജ് പൊലീസില്‍ പരാതി നല്‍കി. സംഭവത്തില്‍ കേസെടുത്ത് പൊലീസ് അന്വേഷണം ആരംഭിച്ചിട്ടുണ്ട്. കൂടുതല്‍ വിവരങ്ങള്‍ ലഭ്യമായിട്ടില്ല.