സംസ്ഥാനത്ത് ക്രമസമാധാനം പൂര്‍ണമായും തകര്‍ന്നുവെന്ന് പ്രതിപക്ഷ നേതാവ് ഉള്‍പ്പെടെ ആരോപണം ഉന്നയിക്കുമ്പോള്‍ തൃശൂരില്‍ ജയില്‍ മോചിതനായ ഗുണ്ടാത്തലവന്റെ ആഘോഷം ചര്‍ച്ചയാകുന്നു. നാല് കൊലക്കേസുകളില്‍ ഉള്‍പ്പെടെ പ്രതിയായ ഗുണ്ടാത്തലവന്‍ അനൂപ് നടത്തിയ പാര്‍ട്ടിയാണ് വലിയ ചര്‍ച്ചകള്‍ക്ക് വഴിവയ്ക്കുന്നത്.
ഫഹദ് ഫാസില്‍ പ്രധാന കഥാപാത്രത്തിലെത്തിയ ആവേശം എന്ന ചിത്രത്തിലെ രംഗ എന്ന കഥാപാത്രത്തെ അനുസ്മരിപ്പിക്കുന്ന വിധത്തിലായിരുന്നു അനൂപിന്റെയും സംഘത്തിന്റെയും ആഘോഷം. ജയിലില്‍ നിന്ന് പുറത്തിറങ്ങിയതിന്റെ ഭാഗമായുള്ള ആഘോഷത്തിലാണ് അറുപതോളം ഗുണ്ടകള്‍ പങ്കെടുത്തത്.
സംഭവത്തിന് പിന്നാലെ ആഘോഷത്തിന്റെ വീഡിയോ റീലുകളാക്കി ഇന്‍സ്റ്റാഗ്രാം ഉള്‍പ്പെടെയുള്ള സാമൂഹ്യമാധ്യമങ്ങളില്‍ പോസ്റ്റ് ചെയ്തിരുന്നു. രണ്ടാഴ്ച മുന്‍പ് നടന്ന ആഘോഷം സംഘടിപ്പിച്ചത് തൃശൂര്‍ കുറ്റൂര്‍ കൊട്ടേക്കാടുള്ള സ്വകാര്യ പാടശേഖരത്തിലായിരുന്നു. വിയ്യൂര്‍ പൊലീസ് സ്റ്റേഷന്‍ പരിധിയിലായിരുന്നു ആഘോഷം നടന്നത്.
ഗുണ്ടകളുടെ ആഘോഷത്തിന് കേസുമായി ബന്ധമില്ലാത്തതിനാലും പാടശേഖരം സ്വകാര്യ വ്യക്തിയുടേതായതിനാലും സംഭവത്തില്‍ പൊലീസ് നടപടിയുണ്ടാകില്ലെന്നാണ് വിവരം.