തനിച്ച് യാത്ര പോവുകയാണെന്നും കൊൽക്കത്തയിൽ നിന്ന് മാറി നിൽക്കുകയാണെന്നും സാമൂഹ്യ മാധ്യമത്തിൽ പോസ്റ്റ് പങ്കുവച്ച് ബംഗാളി നടി. രഞ്ജിത്തിനെതിരായ പരാതിയിൽ പൊലീസ് മൊഴിയെടുക്കാൻ നടപടി തുടങ്ങുമെന്ന സൂചനകൾക്കിടെയാണ് പുതിയ പോസ്റ്റ്.
ഇക്കഴിഞ്ഞ ദിവസമാണ് സംവിധായകൻ രഞ്ജിത്തിനെതിരെ ലൈംഗികാതിക്രമ ആരോപണമുന്നയിച്ച ശേഷമുള്ള സമ്മർദ്ദം താങ്ങാന്‍ കഴിയുന്നില്ലെന്ന് വ്യക്തമാക്കി തത്കാലം ഫേസ്ബുക്ക് ഉപേക്ഷിക്കുകയാണെന്ന് നടി അറിയിച്ചത്. ഇക്കാര്യം വിവരിച്ചുകൊണ്ടുള്ള കുറിപ്പും നടി ഫേസ്ബുക്കിൽ പങ്കുവെച്ചിരുന്നു. ഇപ്പോഴുള്ള സമ്മർദം താങ്ങാൻ പറ്റുന്നില്ലെന്നും തത്കാലം ഫേസ്ബുക്ക് ഉപേക്ഷിക്കുകയാണെന്നും തന്നെ ബന്ധപ്പെടാൻ ശ്രമിക്കരുതെന്നും അവർ കുറിപ്പിൽ വ്യക്തമാക്കിയിരുന്നു.
ഇതിന് പിന്നാലെയാണ് കൊൽക്കത്തയിൽ നിന്ന് തന്നെ മാറി നിൽക്കുകയാണെന്ന് നടി ഇൻസ്റ്റാഗ്രാമിലുടെ അറിയിച്ചിരിക്കുന്നത്. നാളെ തന്‍റെ പിറന്നാള്‍ ആണെന്നും ഒറ്റയ്ക്കുള്ള യാത്രയിലൂടെയാണ് നാളെ ചിലവഴിക്കാന്‍ ആഗ്രഹിക്കുന്നതെന്നും തന്നെ ആരും ബന്ധപ്പെടരുതെന്നും നടി പോസ്റ്റിൽ പറയുന്നു. കൊൽക്കത്തയിൽ ബലാത്സംഗത്തിന് ഇരയായി കൊലപ്പെട്ട ഡോക്ടര്‍ക്ക് നീതി കിട്ടും വരെ കൈയിലുള്ള കറുത്ത റിബണ്‍ മാറ്റില്ലെന്നും പുതിയ പോസ്റ്റില്‍ പറയുന്നുണ്ട്.