പി.ടി തോമസിന്റെ സുപരിചിതമായ നമ്പര്‍ ഇനി ആരും മറക്കേണ്ടെന്ന് പിസി വിഷ്ണുനാഥ് എംഎല്‍എ. പിടിയുടെ ആ നമ്പര്‍ ഉമ തോമസ് ഉപയോഗിക്കുന്നുണ്ടെന്ന് പിസി വിഷ്ണുനാഥ് പറഞ്ഞു. ഫെയ്‌സ്ബുക്ക് കുറിപ്പിലൂടെയായിരുന്നു പ്രതികരണം.
‘ആ പേരില്‍ നിന്ന് ഇനിമേല്‍ ആരും വിളിക്കാനില്ലെന്ന വേദന ബാക്കി നില്‍ക്കുന്നവര്‍ക്ക്, പി.ടിയുടെ സുപരിചിത നമ്പര്‍ സ്വന്തം നമ്പറായി ഉപയോഗിക്കാനുള്ള ഉമ ചേച്ചിയുടെ തീരുമാനം നല്‍കുന്ന ആശ്വാസം ചെറുതല്ല.’ അദ്ദേഹം കുറിച്ചു.
ഫെയ്‌സ്ബുക്ക് കുറിപ്പിന്റെ പൂര്‍ണ്ണരൂപം:
എറണാകുളത്തേക്കുള്ള യാത്രയിലാണ് ; തെരഞ്ഞെടുപ്പ് പ്രചാരണ പരിപാടികള്‍ക്കായി. പുന്നപ്രയില്‍ എത്തിയപ്പോള്‍ ഫോണിലേക്ക് ഒരു കാള്‍ വരുന്നു. ‘പി.ടി’ എന്ന് സ്‌ക്രീനില്‍ തെളിഞ്ഞു !
പെട്ടെന്ന് ഫോണ്‍ എടുത്തു. കാരണം ഈ പേരില്‍ ഫോണ്‍ വരുന്നതെല്ലാം ആദ്യകാലത്ത് ആരാധനയും പിന്നീട് അടുത്ത് പ്രവര്‍ത്തിക്കാന്‍ പറ്റിയതു മുതല്‍ സന്തോഷവും പകരുന്ന കാര്യമാണ്! എടാ അങ്ങനെ ചെയ്യണം , ഇങ്ങനെ ചെയ്യരുത് എന്നെല്ലാം പറഞ്ഞ് നിര്‍ദ്ദേശങ്ങള്‍ നല്‍കുന്ന പി.ടിയെന്ന സ്‌നേഹാനുഭവം അത്ര ആഴത്തിലാണ്.
ഫോണ്‍ എടുത്തപ്പോള്‍ അപ്പുറത്തു നിന്നും ‘വിഷ്ണു, ഉമ ചേച്ചിയാണ് , ഞാന്‍ പതിനൊന്ന് മണി കഴിഞ്ഞ് നോമിനേഷന്‍ കൊടുക്കുകയാണ്. പ്രാര്‍ത്ഥന ഉണ്ടാവണം ‘
ആ പേരില്‍ നിന്ന് ഇനിമേല്‍ ആരും വിളിക്കാനില്ലെന്ന വേദന ബാക്കി നില്‍ക്കുന്നവര്‍ക്ക്, പി.ടിയുടെ സുപരിചിത നമ്പര്‍ സ്വന്തം നമ്പറായി ഉപയോഗിക്കാനുള്ള
ഉമ ചേച്ചിയുടെ തീരുമാനം നല്‍കുന്ന ആശ്വാസം ചെറുതല്ല.
തൃക്കാക്കര അനാഥമാവില്ല…
നന്മ ജയിക്കും ….
തൃക്കാക്കര ജയിക്കും …..