ആലപ്പുഴയില്‍ ഡ്രൈവിംഗ് ടെസ്റ്റിനിടെ വാഹനം കത്തിനശിച്ചു. ഹെവി വാഹനങ്ങളുടെ ഡ്രൈവിംഗ് ടെസ്റ്റിനിടെയാണ് ബസ് പൂര്‍ണമായി കത്തി നശിച്ചത്. ആലപ്പുഴ റീക്രിയേഷന്‍ മൈതാനത്ത് ബുധനാഴ്ച ഉച്ചയ്ക്ക് 12ന് ആയിരുന്നു സംഭവം നടന്നത്. ഓമനപ്പുഴ സ്വദേശി ജിനീഷ് ആയിരുന്നു അപകടം നടക്കുമ്പോള്‍ ബസിലുണ്ടായിരുന്നത്.
ഹെവി ലൈസന്‍സ് ടെസ്റ്റിന്റെ അവസാനഘട്ടത്തിലേക്കെത്തുമ്പോഴായിരുന്നു എന്‍ജിന്റെ ഭാഗത്ത് നിന്ന് പൊട്ടിത്തെറി ശബ്ദത്തോടെ തീയും പുകയും ഉയര്‍ന്നത്. ഇതോടെ യുവാവ് ബസില്‍ നിന്നിറങ്ങി. പാതിരപ്പള്ളി എടുഇസഡ് ഡ്രൈവിംഗ് സ്‌കൂളിന്റെ ബസാണ് അപകടത്തില്‍പ്പെട്ടത്. ബസിന്റെ ബാറ്ററിയിലുണ്ടായ ഷോര്‍ട്ട് സര്‍ക്യൂട്ടാണ് അപകട കാരണമെന്നാണ് വിലയിരുത്തല്‍.
തീ കെടുത്താന്‍ വാഹന ഉടമ ശ്രമിച്ചെങ്കിലും തീ ആളിപ്പടര്‍ന്ന് വാഹനം പൂര്‍ണമായും കത്തി നശിക്കുകയായിരുന്നു. തുടര്‍ന്ന് സ്ഥലത്തെത്തിയ ആലപ്പുഴ അഗ്നിശമന സേനയെത്തി തീ കെടുത്തുകയായിരുന്നു.
