സിപിഐഎം പോളിറ്റ് ബ്യൂറോ അംഗം എ. വിജയരാഘവനെതിരെ വിമർശനവുമായി മുസ്ലിം ലീഗ് നേതാവ് കെ.എം ഷാജി. വിജയരാഘവൻ വർഗീയ രാഘവനാണെന്നും വാ തുറന്നാൽ വർഗീയത മാത്രമാണ് പറയുന്നതെന്നും കെ.എം ഷാജി പറഞ്ഞു. അതേസമയം മുസ്ലീം ലീഗിനെ എങ്ങനെ നന്നാക്കാം എന്ന ചിന്തയിലാണ് പിണറായി വിജയനും കൂട്ടരുമെന്നും കെ എം ഷാജി പറഞ്ഞു.
രാഹുൽ ഗാന്ധിയെയും പ്രിയങ്കാ ഗാന്ധിയെയും ജയിപ്പിച്ചത് ഈ രാജ്യത്തെ വർഗീയ വാദികളാണെന്നും സൂക്ഷിക്കണമെന്നുമാണ് വിജയരാഘവൻ പറഞ്ഞത്. എന്നാൽ ആർഎസ്എസ് പോലും പറയാത്ത വാക്കാണതെന്ന് കെ എം ഷാജി കൂട്ടിച്ചേർത്തു. വർഗീയത ഉണ്ടാക്കിയാൽ നാളെ പത്ത് വോട്ട് കിട്ടാം. അതിനപ്പുറം ഈ രാജ്യം നിലനിൽക്കണ്ടേയെന്നും നമ്മുടെ മക്കൾക്ക് ഇവിടെ ജീവിക്കണ്ടേ എന്നും കെ.എം ഷാജി ചോദിച്ചു.
ലീഗിനെ മര്യാദ പഠിപ്പിക്കാൻ ഇറങ്ങി നടക്കുമ്പോൾ സി.പി.എം അണിയായികൾ പോകുന്നത് ആർ.എസ്.എസിലേക്കാണെന്നും വയനാട്ടിൽ 175ലധികം ബൂത്തുകളിൽ രണ്ടാം സ്ഥാനത്ത് ആർ.എസ്.എസ് ആണെന്നും കെ എം ഷാജി കൂട്ടിച്ചേർത്തു.
