ബിജെപി മുംബൈ യൂണിറ്റ് വക്താവ് സുരേഷ് നഖുവയെ പരിഹസിച്ച് യൂട്യൂബർ ധ്രുവ് റാഠി. മനനഷ്ടം ആരോപിച്ച് ബിജെപി നേതാവ് സുരേഷ് നഖുവ നൽകിയ ഹർജിയിൽ കോടതി സമൻസ് അയച്ചതിന് പിന്നാലെയാണ് ദ്രുവ് റാഠിയുടെ പരിഹാസം. അമ്മാവൻ്റെ അധിക്ഷേപ ചരിത്രം ഒരിക്കൽ കൂടി പരസ്യമാക്കുമെന്നും ദ്രുവ് പരിഹസിക്കുന്നു.
“അമ്മാവൻ എനിക്കെതിരെ 20 ലക്ഷം രൂപയുടെ കേസ് കോടതിയിൽ ഫയൽ ചെയ്‌തു. ഞാൻ അദ്ദേഹത്തെ അധിക്ഷേപിച്ചു എന്ന കാരണത്താൽ. എന്തുകൊണ്ടാണ് അവർ ഇത്രയധികം പരിഹസിക്കപ്പെടാൻ ആഗ്രഹിക്കുന്നത്? ഇപ്പോൾ അമ്മാവൻ്റെ അധിക്ഷേപ ചരിത്രം ഒരിക്കൽ കൂടി പരസ്യമാക്കും”- ദ്രുവ് റാഠിയുടെ എക്സ് പോസ്റ്റ്
ധ്രുവ് റാഠി കഴിഞ്ഞ ദിവസം പുറത്തിറക്കിയ വിഡിയോയിൽ അക്രമവും അധിക്ഷേപകരവുമായ ട്രോളുകളുടെ ഭാഗമാണെന്ന് ആരോപിച്ചായിരുന്നു സുരേഷ് നഖുവ മാനനഷ്ട കേസ് നൽകിയത്. 20 ലക്ഷം രൂപ നഷ്ടപരിഹാരം നൽകണമെന്നാണ് ഹരിയിലെ ആവശ്യം. കേസ് പരിഗണിച്ച കോടതി ധ്രുവ് റാഠിക്ക് സമൻസ് അയച്ചു. ധ്രുവിനെ കൂടാതെ മറ്റ് രണ്ട് പേർക്ക് കൂടി കോടതി സമൻസ് അയച്ചിട്ടുണ്ട്.
ജൂലൈ 7ന് അപ്‌പ്ലോഡ് ചെയ്‌ത വീഡിയോയിൽ റാഠി തന്നെ അക്രമവും അധിക്ഷേപകരവുമായ ട്രോളെന്നാണ് വിശേഷിപ്പിച്ചതെന്ന് ബിജെപി നേതാവ് ആരോപിക്കുന്നു.ഒരടിസ്ഥാനവുമില്ലാതെയാണ് തനിക്കെതിരെ ആരോപണമുന്നയിക്കുന്നതെന്നും തന്നെ അപമാനിക്കുകയാണ് ലക്ഷ്യമെന്നും ബിജെപി നേതാവ് പറഞ്ഞു. അഭിഭാഷകരായ രാഘവ് അവസ്‌തിയും മുകേഷ് ശർമ്മയുമാണ് നഖുവയ്ക്ക് വേണ്ടി കോടതിയിൽ ഹാജരായത്.
“My Reply to Godi Youtubers | Elvish Yadav | Dhruv Rathee” എന്ന പേരിലുള്ള വീഡിയോ ആണ് ഇക്കഴിഞ്ഞ ദിവസം ധ്രുവ് റാഠി പുറത്തുവിട്ടത്. അതിലായിരുന്നു കേസിനാസ്പദമായ ആരോപണം. റാഠിയുടെ വീഡിയോ കാരണം വ്യാപകമായ അപമാനവും പരിഹാസവും നേരിടേണ്ടി വന്നിട്ടുണ്ടെന്നാരോപിച്ച് 20 ലക്ഷം രൂപ നഷ്ടപരിഹാരം നൽകണമെന്നാണ് ബിജെപി നേതാവ് ആവശ്യപ്പെട്ടിട്ടുള്ളത്. അതേസമയം കേസ് പരിഗണിക്കുന്നത്‌ ഓഗസ്റ്റ് 6ലേക്ക് മാറ്റി.
