സെല്‍ഫിയെടുക്കാന്‍ ശ്രമിക്കുന്നതിനിടെ 100 അടി താഴ്ചയുള്ള കൊക്കയില്‍ വീണ യുവതിയെ രക്ഷപ്പെടുത്തി. മഹാരാഷ്ട്രയിലെ സത്താറയിലാണ് സംഭവം നടന്നത്. സുഹൃത്തുക്കള്‍ക്കൊപ്പം ദോസ്ഘര്‍ വെള്ളച്ചാട്ടം കാണാനെത്തിയ പൂനെയില്‍ നിന്നുള്ള 29കാരിയാണ് സെല്‍ഫിയെടുക്കാന്‍ ശ്രമിക്കുന്നതിനിടെ കൊക്കയിലേക്ക് വീണത്.
മൂന്ന് യുവതികളും അഞ്ച് യുവാക്കളുമടങ്ങുന്ന സംഘമാണ് ദോസ്ഘര്‍ വെള്ളച്ചാട്ടം കാണാനെത്തിയത്. കനത്ത മഴ നിലനില്‍ക്കുന്നതിനാല്‍ പ്രദേശം അടച്ചിട്ടിരിക്കുകയായിരുന്നു. വെള്ളച്ചാട്ടത്തിന് സമീപമായിരുന്നു യുവതി വീണത്. യുവതിയുടെ നിലവിളി കേട്ട് സ്ഥലത്തെത്തിയ ഹോംഗാര്‍ഡും യുവതിയ്‌ക്കൊപ്പമുണ്ടായിരുന്ന യുവാക്കളും ചേര്‍ന്നാണ് ഇവരെ രക്ഷപ്പെടുത്തിയത്.
യുവതിയെ രക്ഷപ്പെടുത്തിയതിന് പിന്നാലെ ആശുപത്രിയില്‍ പ്രവേശിപ്പിച്ചിട്ടുണ്ട്. ഇവരുടെ ആരോഗ്യനില തൃപ്തികരമാണെന്ന് ഡോക്ടര്‍മാര്‍ അറിയിച്ചു. യുവതിയെ രക്ഷപ്പെടുത്തുന്ന വീഡിയോ പുറത്തുവന്നിട്ടുണ്ട്. വീഡിയോ ഇതോടകം സാമൂഹ്യ മാധ്യമങ്ങളില്‍ വൈറലായിട്ടുണ്ട്.