ലോക്‌സഭാ തിരഞ്ഞെടുപ്പിന്റെ അവസാനഘട്ടത്തോട് അടുക്കുന്നതിന് പിന്നാലെ ബിജെപിക്ക് ബംഗാളില്‍ കനത്ത തിരിച്ചടി. പാര്‍ട്ടി നിലപാടുകളില്‍ വിയോജിപ്പ് പ്രഖ്യാപിച്ച് ജാംര്‍ഗ്രാം എംപി കുനാര്‍ ഹേംബ്രത്തി തൃണമൂല്‍ കോണ്‍ഗ്രസില്‍ ചേര്‍ന്നു. ബിജെപി ഇത്തവണ സീറ്റ് നിഷേധിച്ചതിന് പിന്നാലെയാണ് പാര്‍ട്ടി മാറ്റം.
ലോക്‌സഭാ തെരഞ്ഞെടുപ്പിന്റെ ആറാം ഘട്ടത്തില്‍ ജാംര്‍ഗ്രാമില്‍ തെരഞ്ഞെടുപ്പ് നടക്കാനിരിക്കെയാണ് കുനാറിന്റെ കളംമാറ്റം. ബിജെപി ഒരു ഗോത്ര വിരുദ്ധ പാര്‍ട്ടിയാണ്. അവര്‍ക്ക് ഗോത്ര വിഭാഗങ്ങളുടെ അവകാശങ്ങളെ കുറിച്ച് അറിയില്ലെന്ന് കുനാര്‍ പറഞ്ഞു.
പാര്‍ട്ടി വിട്ട കുനാറിന്റെ നടപടിയില്‍ പ്രതികരിച്ച് ബിജെപി രംഗത്തെത്തി. കുനാര്‍ ഹേംബ്രത്തിന്റെ പുറത്തുപോകല്‍ ബിജെപിയെ ഒരു തരത്തിലും ബാധിക്കില്ലെന്ന് പാര്‍ട്ടി സംസ്ഥാന പുറത്തിറക്കിയ പ്രസ്താവനയില്‍ പറഞ്ഞു.
