മുസ്ലിങ്ങൾക്ക് ആർഎസ്എസ് ശാഖകളിൽ പങ്കെടുക്കാമെന്ന് ആർഎസ്എസ് സർ സംഘചാലക് മോഹൻ ഭാഗവത്. ഇതിനായി രണ്ട് നിബന്ധനകൾ അംഗീകരിക്കണമെന്നാണ് മോഹൻ ഭാഗവത് പറയുന്നത്. ‘ഭാരത് മാതാ കീ ജയ്’ വിളിക്കണമെന്നതാണ് ഒന്നാമത്തെ നിബന്ധന.
കാവി കൊടിയെ അംഗീകരിക്കുക എന്നതാണ് രണ്ടാമത്തെ നിബന്ധന. ഈ രണ്ട് നിബന്ധനകളും അംഗീകരിക്കുന്ന, മുസ്ലിങ്ങൾ ഉൾപ്പടെയുള്ള എല്ലാവർക്കും ആർഎസ്എസ് ശാഖകളിൽ പങ്കെടുക്കാമെന്നാണ് മോഹൻ ഭാഗവത് വ്യക്തമാക്കിയത്.
വാരണസി സന്ദർശനത്തിനിടയിൽ മോഹൻ ഭാഗവത്, ഒരു ആർഎസ്എസ് ശാഖയിലെത്തിയപ്പോൾ ഒരു ആർഎസ്എസ് പ്രവർത്തകൻ ഉന്നയിച്ച ചോദ്യത്തിന് മറുപടിയായാണ് മുസ്‌ലിങ്ങൾക്കും ശാഖയിൽ പങ്കെടുക്കാമെന്ന് ഭാഗവത് പറഞ്ഞത്. എന്നാൽ, ശാഖകളിൽ വരുന്നവർക്ക് ഭാരത് മാതാ കീ ജയ് വിളിക്കാൻ ശങ്ക ഉണ്ടാകരുത്. അതുപോലെ കാവിക്കൊടിയെ ആദരിക്കണമെന്നും കൂട്ടിച്ചേർത്തു.
വ്യത്യസ്തമായ മതാചാരങ്ങൾ ഉണ്ടെങ്കിലും, ഇന്ത്യക്കാരുടെ സംസ്‌കാരം ഒന്നാണ്. എല്ലാ വിശ്വാസത്തിൽപ്പെട്ടവർക്കും ജാതിയിൽ പെട്ടവർക്കും ആർഎസ്എസ് ശാഖകളിലേക്ക് എത്താമെന്നും മോഹൻ ഭാഗവത് പറഞ്ഞു.
