മാധ്യമപ്രവര്‍ത്തക റാണാ അയൂബിനെതിരെ ബലാത്സംഗ- വധ ഭീഷണി മുഴക്കിയ യുവാവിനെ അറസ്റ്റ് ചെയ്തു. സോഷ്യല്‍മീഡിയയിലൂടെ അധിക്ഷേപകരമായ കമന്റുകളും ബലാത്സംഗ- വധ ഭീഷണിയും പോസ്റ്റ് ചെയ്തുവെന്ന പരാതിയിലാണ് അറസ്റ്റ്. ബോപ്പാല്‍ സ്വദേശി സിദ്ധാര്‍ഥ് ശ്രീവാസ്തവിനെയാണ് മുംബൈ പോലീസ് അറസ്റ്റ് ചെയ്തത്.
റാണാ അയൂബ് മാധ്യമപ്രവര്‍ത്തനം തുടരുകയാണെങ്കില്‍ കൊലപ്പെടുത്തുമൊയിരുന്നു മുന്നറിയിപ്പ്. കൂടാതെ അശ്ലീല കമന്റുകളും ഇയാള്‍ പോസ്റ്റ് ചെയ്തിരുന്നു. സിദ്ധാര്‍ഥ് ഉപയോഗിക്കുന്ന സോഷ്യല്‍ മീഡിയ അക്കൗണ്ടുകള്‍ വ്യാജമാണെന്ന് പോലീസ് അറിയിച്ചു. ലൈംഗിക അധിക്ഷേപം, അപകീര്‍ത്തിപ്പെടുത്തല്‍, ഭീഷണിപ്പെടുത്തല്‍,
സ്ത്രീയുടെ മാന്യതയെ അപമാനിക്കാന്‍ ഉദ്ദേശിച്ചുള്ള പ്രവൃത്തി തുടങ്ങിയ വകുപ്പുകളും ഇന്‍ഫര്‍മേഷന്‍ ടെക്‌നോളജി നിയമത്തിലെ വകുപ്പുകളും ചുമത്തിയാണ് ഇയാള്‍ക്കെതിരെ കേസെടുത്തിരിക്കുന്നത്. ഇത് ഉള്‍പ്പടെ 26000 ത്തോളം അശ്ലീല കമന്റുകള്‍ സമൂഹമാധ്യമങ്ങളിലൂടെ തനിക്കെതിരെ വന്നിട്ടുണ്ടെന്ന് റാണാ അയൂബ് സൈബര്‍സെല്ലിന് പരാതി നല്‍കിയിരുന്നു.
