ഗുജറാത്തിലെ അഹമ്മദാബാദില്‍ കോവിഡ് നിയന്ത്രണങ്ങള്‍ ലംഘിച്ച് വളര്‍ത്തുനായയുടെ ജന്മദിനാഘോഷം സംഘടിപ്പിച്ച സംഭവത്തില്‍ മൂന്ന് പേര്‍ അറസ്റ്റില്‍. സഹോദരങ്ങളായ ചിരാഗ് പട്ടേല്‍, ഉര്‍വിഷ് പട്ടേല്‍ ഇവരുടെ സുഹൃത്തായ ദിവ്യേഷ് മെഹരിയ എന്നിവരാണ് അറസ്റ്റിലായത്. മൂന്ന് പേരും അഹമ്മദാബാദ് കൃഷ്ണനഗര്‍ സ്വദേശികളാണ്.
വെള്ളിയാഴ്ചയാണ് ചിരാഗിന്റെയും ഉര്‍വിഷിന്റെയും വളര്‍ത്തുനായായ അബ്ബിയുടെ ജന്മദിനം ആഘോഷിച്ചത്. ഏഴുലക്ഷം രൂപ മുടക്കി നടത്തിയ ആഡംബര പാര്‍ട്ടിയുടെ ദൃശ്യങ്ങള്‍ സമൂഹ മാധ്യമങ്ങളില്‍ വൈറലായിരുന്നു. അഹമ്മദാബാദിലെ നികോള്‍ പ്രദേശത്തെ മധുബന്‍ ഗ്രീനിലായിരുന്നു ആഘോഷങ്ങള്‍ നടന്നത്. മനോഹരമായ അലങ്കാരങ്ങളും നായയുടെ നിരവധി പോസ്റ്ററുകളും ഇവിടെ സ്ഥാപിച്ചിട്ടുണ്ടായിരുന്നു. കേക്ക് മുറിക്കുകയും ഗുജറാത്തി നാടന്‍പാട്ട് അവതരണവും ഉണ്ടായിരുന്നു.
പരിപാടിയില്‍ പങ്കെടുത്തവര്‍ മാസ്‌ക് ധരിക്കുകയോ, സാമൂഹിക അകലം പാലിക്കുകയോ ചെയ്തിട്ടില്ല. ആഘോഷങ്ങളുടെ ചിത്രങ്ങളില്‍ ഇത് വ്യക്തമാണ്. കോവിഡ് മാനദണ്ഡങ്ങള്‍ ലംഘിച്ചതിന് പാര്‍ട്ടിയുടെ സംഘാടകര്‍ക്കെതിരെ കേസെടുക്കും എന്ന് പൊലീസ് അറിയിച്ചിരുന്നു. തുടര്‍ന്ന് പകര്‍ച്ചവ്യാധി നിയന്ത്രണ നിയമത്തിലെ വിവിധ വകുപ്പുകള്‍ പ്രകാരം ശനിയാഴ്ചയാണ് ഇവരെ നികോള്‍ പൊലീസ് അറസ്റ്റ് ചെയ്തത്. കോവീഡ് വ്യാപനം രൂക്ഷമാകുന്ന സാഹചര്യത്തില്‍ ഗുജറാത്ത് സര്‍ക്കാര്‍ നിയന്ത്രണങ്ങള്‍ ശക്തിപ്പെടുത്തുകയാണ്. ഇതിനിടയിലാണ് ഈ സംഭവം.