ഡൽഹി ജെഎന്‍യു സര്‍വകലാശാലയില്‍ മുഖംമൂടിയിട്ട ഒരു സംഘമെത്തി വിദ്യാർത്ഥികളെയും അദ്ധ്യാപകരെയും ആക്രമിച്ച സംഭവത്തിൽ വിവാദ പരാമർശവുമായി ബി.ജെ.പി നേതാവ് ഉമാഭാരതി. രാജ്യത്തെ ഒരു സംഘം ചിന്തകര്‍ സമൂഹത്തിൽ വിഷം ചീറ്റാനാണ് ശ്രമിക്കുന്നതെന്നായിരുന്നു ബി.ജെ.പി നേതാവിന്റെ പരാമർശം. ഒരു പ്രത്യേക തരം പാമ്പിനെപ്പോലെ ഇവർ എണ്ണത്തിൽ കുറവാണെങ്കിലും വിഷം വളരെ കൂടുതാണെന്നും അവർ പറഞ്ഞു.
“ഇവിടെ പ്രത്യേക ഗണത്തിൽ ഉൾപ്പെടുന്ന പാമ്പുകളുണ്ട്. എണ്ണത്തിൽ വളരെ കുറവായിരിക്കും. പക്ഷെ കൊടിയ വിഷമുള്ളതാണ്. രാജ്യത്ത് ഒരു സംഘം ചിന്തകരുണ്ട്. അവരും എണ്ണത്തിൽ കുറവാണ്. പക്ഷെ വളരെ വിഷമുള്ളവരാണ്. സമൂഹത്തിൽ വിഷം കലർത്താനാണ് അവരുടെ ശ്രമം. ഞങ്ങൾ ചില കാര്യങ്ങൾ പരിഹരിക്കേണ്ടതുണ്ട്, അവ ഞങ്ങൾ പരിഹരിച്ചിരിക്കും.”-ഉമാഭാരതിയെ ഉദ്ധരിച്ച് വാർത്താ ഏജൻസിയായ എ.എൻ.ഐ റിപ്പോർട്ട് ചെയ്തു.
ഫീസ് വർദ്ധനയ്‌ക്കെതിരെ പ്രതിഷേധിക്കുന്ന വിദ്യാർത്ഥികൾക്ക് നേരെയാണ് കഴിഞ്ഞ ദിവസം ആക്രമണമുണ്ടായത്. മുഖംമൂടി ധരിച്ച ഒരു സംഘം ആളുകൾ മാരകായുധങ്ങലുമായി ജെ.എൻ.യു ക്യാമ്പസിലേക്ക് അതിക്രമിച്ച് കയറി വിദ്യാർത്ഥികളെയും അദ്ധ്യാപകരെയും ആക്രമിക്കുകയായിരുന്നു. വിദ്യാർത്ഥി യൂണിയൻ പ്രസിഡന്റ് ഐഷി ഘോഷ് അടക്കം നിരവധി പേർക്ക് പരിക്കേറ്റിരുന്നു. അക്രമികളെ തടയാൻ കാര്യമായൊന്നും ചെയ്തില്ലെന്ന് ആരോപിക്കപ്പെടുന്ന പൊലീസ് ആക്രമണത്തിന് ഇരയായവർക്കെതിരെ നാശനഷ്ട കേസ് ഫയൽ ചെയ്തിട്ടുണ്ട്.
സംഭവത്തിൽ വൈസ് ചാൻസലർ ജഗദീഷ് കുമാറിനെതിരെ വലിയ പ്രതിഷേധമുയർന്നിരുന്നു. വൈസ് ചാൻസലർ രാജി വെയ്ക്കണമെന്ന് ആവശ്യപ്പെട്ട് നിരവധി പേരാണ് രംഗത്തെത്തിയത്.