18 വയസുകാരനെ വെറും 350 രൂപയ്ക്കുവേണ്ടി കുത്തിക്കൊലപ്പെടുത്തി 16 വയസുകാരന്റെ ക്രൂരത. ചൊവ്വാഴ്ച രാത്രി വടക്കുകിഴക്കന്‍ ദില്ലിയിലെ ജന്ത മസ്ദൂർ കോളനിയിലാണ് ക്രൂരമായ കൊലപാതകം നടന്നത്. പ്രായപൂര്‍ത്തിയാകാത്ത പ്രതി 18കാരനെ കത്തികൊണ്ട് 60 തവണ കുത്തിയതായാണ് റിപ്പോർട്ട്.
കൃത്യം നടത്തിയ ശേഷം പ്രതി മൃതദേഹത്തിനരികിൽ നൃത്തം ചെയ്തതായും സംഭവസ്ഥലത്തു നിന്നുള്ള സിസി ടിവി ദൃശ്യങ്ങളിൽ വ്യക്തമായിട്ടുണ്ട്. കൊല്ലപ്പെട്ടയാളും കൊലപാതകിയും തമ്മില്‍ മുന്‍പരിചയമില്ല. കഴുത്ത് ഞെരിച്ച് ബോധരഹിതനാക്കിയ ശേഷമാണ്, കുത്തിക്കൊലപ്പെടുത്തിയത്. 350 രൂപയാണ് പ്രതിക്ക് കിട്ടിയത്.
മരണം ഉറപ്പാക്കാനായി പല തവണ 18കാരന്‍റെ കഴുത്തില്‍ അക്രമി കുത്തി. മൃതദേഹം കാല്‍ കൊണ്ട് ചവിട്ടിത്തെറിപ്പിക്കാനും ശ്രമിച്ചു. ശേഷം പ്രതി മൃതദേഹത്തിനു മുകളില്‍ കയറിനിന്നു. മൃതദേഹത്തിനരികെ നൃത്തം ചെയ്യുന്നതായി സിസി ടിവിയിൽ കാണാം. തുടർന്ന് മൃതദേഹം ഇടുങ്ങിയ ഇടവഴിയിലേക്ക് വലിച്ചിഴയ്ക്കുന്ന ദൃശ്യങ്ങളും ലഭിച്ചു.
ചൊവ്വാഴ്ച രാത്രിയോടെയാണ് പൊലീസിന് വിവരം ലഭിച്ചത്.കവര്‍ച്ചാ ശ്രമത്തിനിടെയായിരുന്നു കൊലപാതകം. കുത്തേറ്റയാളെ ഉടന്‍ ആശുപത്രിയില്‍ പ്രവേശിപ്പിച്ചെങ്കിലും മരണം സംഭവിച്ചിരുന്നതായി ഡെപ്യൂട്ടി പൊലീസ് കമ്മീഷണർ ജോയ് ടിർക്കി . ഫോറന്‍സിക് സംഘം സ്ഥലത്തെത്തി പരിശോധിച്ചു. പ്രായപൂര്‍ത്തിയാകാത്ത പ്രതിയെ പൊലീസ് അറസ്റ്റ് ചെയ്തു.