രാഷ്ട്രപതി തിരഞ്ഞെടുപ്പിൽ എൻഡിഎ സ്ഥാനാർഥി ദ്രൗപതി മുർമുവിനെ പിന്തുണയ്ക്കുമെന്ന് പ്രഖ്യാപിച്ച് ബിഎസ്പി നേതാവ് മായാവതി. ഗോത്ര വിഭാഗത്തിൽനിന്നുള്ളയാൾ എന്ന നിലയ്ക്കാണ് മുർമുവിനെ പിന്തുണക്കുന്നതെന്നും, ആ പിന്തുണ ബിജെപിക്കോ എൻഡിഎയ്‌ക്കോ ഉള്ള പിന്തുണയായി കാണേണ്ടതില്ലെന്നും മായാവതി പറഞ്ഞു.
യുപിഎയോടുള്ള എതിർപ്പായും ഇതിനെ കണക്കാക്കേണ്ടതില്ല. ഗോത്ര വിഭാഗത്തിൽ നിന്നുള്ള ഒരാൾ രാഷ്ട്രപതി സ്ഥാനത്തേക്ക് എത്തുന്നത് പിന്തുണയ്ക്കപ്പെടേണ്ടതാണ്. അതുകൊണ്ടാണ് പാർട്ടി ഇത്തരമൊരു നിലപാട് എടുക്കുന്നതെന്നും മായാവതി കൂട്ടിച്ചേർത്തു.
രാഷ്ട്രപതി തിരഞ്ഞെടുപ്പ് ചർച്ച ചെയ്യാൻ പശ്ചിമ ബംഗാൾ മുഖ്യമന്ത്രി മമത ബാനർജി വിളിച്ച യോഗത്തിലും, ശരദ് പവാർ വിളിച്ച യോഗത്തിലേക്കും ബിഎസ്പിയെ വിളിച്ചില്ല. ചില പാർട്ടികൾക്ക് മാത്രമാണ് ക്ഷണമുണ്ടായത് ഇത് ഇരുവരുടെയും ജാതി വിവേചനമാണ് വ്യക്തമാക്കുന്നതെന്ന് മായാവതി ആരോപിച്ചു.
പ്രതിപക്ഷ പാർട്ടികളുടെ കൂടിയാലോചനകളിൽ ബിഎസ്പിയെ ക്ഷണിച്ചിട്ടില്ല. അതുകൊണ്ടുതന്നെ രാഷ്ട്രപതി തെരഞ്ഞെടുപ്പിൽ ബിഎസ്പി സ്വതന്ത്രമായ നിലപാട് എടുക്കുകയാണെന്ന് മായാവതി പറഞ്ഞു.