ആനിമേറ്റഡ് വീഡിയോ പങ്കുവെച്ച കേസില്‍ ബിജെപി ദേശീയ അദ്ധ്യക്ഷന്‍ ജെപി നഡ്ഡയ്‌ക്കെതിരേയടക്കം മൂന്നുപേര്‍ക്കെതിരെ കേസെടുത്ത് പൊലീസ്. കര്‍ണാടക ബിജെപി അധ്യക്ഷന്‍ ബിവൈ വിജയേന്ദ്ര, ഐടി സെല്‍ മേധാവി അമിത് മാളവിയ എന്നിവര്‍ക്കെതിരെയുമാണ് കേസെടുത്തിരിക്കുന്നത്.
കര്‍ണാടക ബിജെപിയുടെ സമൂഹമാധ്യമ അക്കൗണ്ടുകളിലൂടെ പങ്കുവെച്ച വീഡിയോയാണ് കേസിനാസ്പദമായ സംഭവം. വീഡിയോയിലൂടെ വര്‍ഗീയ വിദ്വേഷവും ശത്രുതയും പ്രചരിപ്പിച്ചുവെന്ന കോണ്‍ഗ്രസ് പരാതിയിലാണ് കേസെടുത്തിരിക്കുന്നത്. കര്‍ണാടക കോണ്‍ഗ്രസ് ലീഗല്‍ യൂണിറ്റ് അംഗമായ രമേഷ് ബാബുവാണ് ഇത് സംബന്ധിച്ച് പരാതി നല്‍കിയത്.
വിഡിയോയില്‍ കോണ്‍ഗ്രസ് നേതാവ് രാഹുല്‍ ഗാന്ധിയും കര്‍ണാടക മുഖ്യമന്ത്രി സിദ്ധരാമയ്യയും മുസ്ലിങ്ങള്‍ക്ക് വലിയ രീതിയില്‍ ഫണ്ട് നല്‍കുന്നതായി കാണിക്കുന്നുണ്ട്. കഴിഞ്ഞ ദിവസമാണ് 17-സെക്കന്‍ഡ് ദൈര്‍ഘ്യമുള്ള ആനിമേറ്റഡ് വീഡിയോ ട്വീറ്റ് ചെയ്യുന്നത്.
രാഹുല്‍ ഗാന്ധിയുടേയും സിദ്ധരാമയ്യയുടേയും കാരിക്കേച്ചറുകളാണ് വീഡിയോയിലുള്ളത്. അവര്‍ മുസ്ലിം എന്ന് രേഖപ്പെടുത്തിയ മുട്ട ഒരു പക്ഷിക്കൂട്ടില്‍ നിക്ഷേപിക്കുന്നതായാണ് കാണിക്കുന്നത്. പക്ഷിക്കൂട്ടില്‍ എസ്.സി, എസ്.ടി, ഒ.ബി.സി എന്നിങ്ങനെ രേഖപ്പെടുത്തിയ മുട്ടകളുമുണ്ട്. മുട്ട വിരിഞ്ഞതിന് ശേഷം രാഹുല്‍ ഗാന്ധി മുസ്ലിം എന്ന് രേഖപ്പെടുത്തിയ പക്ഷിക്ക് ഫണ്ടുകള്‍ നല്‍കുന്നു. മറ്റുള്ള പക്ഷികള്‍ അതിനായി ശ്രമിക്കുന്നുണ്ടെങ്കിലും അവര്‍ക്ക് അത് നല്‍കുന്നില്ല.. ഇതായിരുന്നു വീഡിയോയുടെ ഉള്ളടക്കം. തിരഞ്ഞെടുപ്പിനിടെ ബിജെപിയെ നയിക്കുന്ന ദേശീയ അധ്യക്ഷനെതിരെ തന്നെ വ്യാജ പ്രചരണത്തിന് കേസെടുത്തിരിക്കുന്നത് പാര്‍ട്ടിക്ക് തിരിച്ചടിയായിട്ടുണ്ട്.