ചരിത്രത്തില്‍ ആദ്യമായി മുഖ്യ തിരഞ്ഞെടുപ്പു കമ്മീഷണര്‍ക്ക് സായുധ കമാന്‍ഡോകളുടെ സെഡ് കാറ്റഗറി വിഐപി സുരക്ഷയേര്‍പ്പെടുത്തി. രാജീവ് കുമാറിനെതിരേയുള്ള അന്താരാഷ്ട്ര ഭീഷണികള്‍ കൂടി കണക്കിലെടുത്താണു സെഡ് കാറ്റഗറി വിഐപി സുരക്ഷ നല്‍കിയതെന്ന് ആഭ്യന്തരമന്ത്രാലയം വ്യക്തമാക്കി. കേന്ദ്ര റിസര്‍വ് പോലീസ് സേനയുടെ (സിആര്‍പിഎഫ്) സായുധരായ 40- 45 അംഗ സംഘത്തിന്റെ സുരക്ഷയായും രാജീവ് കുമാറിന് ഉണ്ടാകുക.
രാജീവിന്റെ വസതിയില്‍ സ്ഥിരമായുള്ള പത്തു സുരക്ഷാസൈനികര്‍ക്കു പുറമെ ആറു വ്യക്തിഗത സുരക്ഷാ ഉദ്യോഗസ്ഥര്‍ മുഴുവന്‍ സമയവും അദ്ദേഹത്തിന് കൂടെ ഉണ്ടാകും. മൂന്നു ഷിഫ്റ്റുകളിലായി പ്രവര്‍ത്തിക്കുന്ന 12 സായുധ കമാന്‍ഡോകളും ഉണ്ടാകും.
പ്രത്യേക പരിശീലനം ലഭിച്ച മൂന്ന് ഡ്രൈവര്‍മാരും സദാസമയവും സജ്ജരായ രണ്ടു വാച്ചര്‍മാരും രാജീവിന് വേണ്ടി കേന്ദ്രം അനുവദിച്ചിട്ടുണ്ട്.
. 1984 ബാച്ചിലെ വിരമിച്ച ഐഎഎസ് ഉദ്യോഗസ്ഥനായ രാജീവ് കുമാര്‍, 2022 മേയ് 15നാണ് രാജ്യത്തിന്റെ 25-ാമത് മുഖ്യ തെരഞ്ഞെടുപ്പ് കമ്മീഷണറായി ചുമതലയേറ്റത്.
മുഖ്യ തെരഞ്ഞെടുപ്പു കമ്മീഷണറായിരിക്കെ ടി.എന്‍. ശേഷന് ഇടക്കാലത്ത് കേന്ദ്രം സുരക്ഷാകവചം ഏര്‍പ്പെടുത്തിയിരുന്നെങ്കിലും ആര്‍ക്കും സെഡ് കാറ്റഗറി സുരക്ഷാ സംവിധാനം നല്‍കിയിരുന്നില്ല.