മുബൈയിൽ വിരമിക്കുന്ന ജീവനക്കാർക്ക് നൽകാനായി ശേഖരിച്ച 80 ലക്ഷത്തിന്റെ സ്വർണനാണയങ്ങൾ മോഷണം പോയി. ഷിപ്പിംഗ് റിക്രൂട്ട്‌മെൻ്റ് സ്ഥാപനത്തിൻ്റെ ഓഫീസിൻ്റെ ലോക്കറിൽ നിന്നാണ് നാണയങ്ങൾ മോഷണം പോയത്. സംഭവത്തിൽ പൊവായ് പൊലീസ് കേസെടുത്തു.
ഓഗസ്റ്റ് ഒമ്പതിന് ഓഫീസ് ജീവനക്കാരിലൊരാൾ സേഫ് പരിശോധിച്ചപ്പോഴാണ് ലോക്കറിൽ നിന്ന് സ്വർണനാണയങ്ങൾ നഷ്ടപ്പെട്ടതായി കണ്ടെത്തിയത്. ജീവനക്കാർ ഓഫീസിൽ പലയിടത്തും തിരച്ചിൽ നടത്തിയെങ്കിലും സ്വർണനാണയങ്ങൾ കണ്ടെത്താനായില്ല. തുടർന്നാണ് സ്ഥാപനത്തിലെ ഡയറക്ടർ ജനറൽ മാനേജരായി ജോലി ചെയ്യുന്ന രാഹുൽ ഡി പൊലീസിൽ പരാതി നൽകിയത്.
ബിഎൻഎസിൻ്റെ സെക്ഷൻ 306 പ്രകാരമാണ് കേസ് രജിസ്റ്റർ ചെയ്തിരിക്കുന്നത്. സംഭവത്തിൽ പൊലീസ് അന്വേഷണം തുടങ്ങിയിട്ടുണ്ട്. പൊലീസിന്റെ അന്വേഷണത്തിലും ഒന്നും കണ്ടെത്താനായിരുന്നില്ല. അന്വേഷണത്തിൽ ജൂലായ് 22 മുതൽ ജീവനക്കാരിലൊരാൾ അസുഖ അവധിയിൽ ജോലിക്ക് ഹാജരായിട്ടില്ലെന്ന് പൊലീസ് കണ്ടെത്തി. കമ്പനിക്കുള്ളിൽ നിന്നുമുള്ള ആരോ ആണ് സംഭവത്തിന് പിന്നിലെന്നാണ് പൊലീസിന്റെ പ്രാഥമിക നിഗമനം.
ലോകത്തിന്റെ വിവിധഭാഗങ്ങളിലേക്ക് ഷിപ്പിംഗുമായി ബന്ധപ്പെട്ട കമ്പനികളുടെ ആവശ്യങ്ങൾക്കനുസരിച്ച് കപ്പൽ ജീവനക്കാരെ കമ്പനി റിക്രൂട്ട് ചെയ്യുന്നു. യുകെ ആസ്ഥാനമായുള്ള സ്ഥാപനമാണ് മുംബൈയിലെ സ്ഥാപനത്തിൻ്റെ പ്രവർത്തനങ്ങൾ നിയന്ത്രിക്കുന്നത്. എല്ലാ വർഷവും, 5, 10, 15, 20 വർഷം സർവീസ് പൂർത്തിയാക്കിയ ജീവനക്കാർക്ക് കമ്പനി 2, 5, 8, 10, 12, 15, 20 ഗ്രാം സ്വർണ നാണയങ്ങൾ സമ്മാനമായി നൽകാറുണ്ട്. ഇത്തരത്തിൽ ഈ പ്രത്യേക ജോലി നോക്കുന്ന 12 ജീവനക്കാരുടെ പ്രത്യേക വകുപ്പും കമ്പനിയിലുണ്ട്. ഇങ്ങനെ വിതരണം ചെയ്യുന്ന നാണയങ്ങളിൽ അവശേഷിക്കുന്നവ മറ്റൊരു ലോക്കറിൽ കമ്പനി സൂക്ഷിക്കും.