ലോക്‌സഭ തിരഞ്ഞെടുപ്പ് ആറാം ഘട്ടത്തിലെത്തി നില്‍ക്കുമ്പോള്‍ കോണ്‍ഗ്രസിനെതിരെ വീണ്ടും കടുത്ത വിമര്‍ശനങ്ങളുന്നയിച്ച് പ്രധാനമന്ത്രി. കാണ്‍ഗ്രസിന്റെ നേതൃത്വത്തില്‍ ഇന്ത്യ മുന്നണി അധികാരത്തിലെത്തിയാല്‍ അവര്‍ നിങ്ങളുടെ വീട്ടിലെ തൊട്ടിവരെ എടുത്തുകൊണ്ട് പോകുമെന്ന് ഉത്തര്‍പ്രദേശിലെ ശ്രാവസ്തിയിലെ ബിജെപി തിരഞ്ഞെടുപ്പ് റാലിയില്‍ പങ്കെടുത്തുകൊണ്ട് പറഞ്ഞു.
കോണ്‍ഗ്രസ് നിങ്ങളുടെ ബാങ്ക് അക്കൗണ്ടുകള്‍ പൂട്ടിച്ച് പണവുമായി മുങ്ങും. മോദി സര്‍ക്കാര്‍ എല്ലാ ഗ്രാമങ്ങളിലും വൈദ്യുതി എത്തിച്ചു. അവര്‍ വൈദ്യുതി വിച്ഛേദിച്ചിട്ട് നിങ്ങളെ ഇരുട്ടിലാക്കും. മോദി എല്ലാ വീട്ടിലും വെള്ളം എത്തിച്ചു. കോണ്‍ഗ്രസുകാര്‍ നിങ്ങളുടെ വീട്ടിലെ വെള്ളം കോരുന്ന തൊട്ടി വരെ എടുത്തുകൊണ്ട് പോകും. അക്കാര്യത്തില്‍ അവര്‍ വിദഗ്ധരാണെന്നും മോദി കൂട്ടിച്ചേര്‍ത്തു.
ഇന്ത്യ സഖ്യം വര്‍ഗീയതയും ജാതിവാദവും കുടുംബ ഭരണവും ചേര്‍ന്നതാണ്. ഇത് അര്‍ബുദത്തിന് സമാനമാണ്. പതിയെ ഇന്ത്യയെ മുഴുവന്‍ കാര്‍ന്നുതിന്നുമെന്നും പ്രധാനമന്ത്രി പറഞ്ഞു. നേരത്തെയും കോണ്‍ഗ്രസിനെതിരെ നടത്തിയ മംഗല്യസൂത്ര പരാമര്‍ശം വന്‍ വിവാദങ്ങള്‍ക്ക് വഴി വച്ചിരുന്നു. കോണ്‍ഗ്രസ് അധികാരത്തിലെത്തിയാല്‍ സ്ത്രീകളുടെ താലിമാലയും ആഭരണങ്ങളും വരെ തട്ടിയെടുക്കുമെന്നായിരുന്നു മോദിയുടെ പ്രസംഗം.