ഭരണഘടന വെറുമൊരു പുസ്തകമല്ല, ഒരു ജീവിതരീതിയാണെന്ന് കോണ്‍ഗ്രസ് നേതാവ് രാഹുല്‍ ഗാന്ധി. ആര്‍എസ്എസും ബിജെപിയും ഭരണഘടനയെ ആക്രമിക്കുമ്പോള്‍ അവര്‍ ആക്രമിക്കുന്നത് രാജ്യത്തിന്റെ ശബ്ദത്തെയാണെന്നും രാഹുല്‍ ഗാന്ധി പറഞ്ഞു. നാഗ്പൂരില്‍ നടന്ന സംവിധാന്‍ സമ്മാന്‍ സമ്മേളനത്തില്‍ സംസാരിക്കുകയായിരുന്നു രാഹുല്‍ ഗാന്ധി.
രാജ്യത്ത് ജാതി സെന്‍സസ് നടത്തും. ജാതി സെന്‍സസ് പൂര്‍ത്തിയാകുന്നതോടെ ദളിത്, ഒബിസി, ആദിവാസി വിഭാഗങ്ങള്‍ നേരിടുന്ന അനീതി പുറത്തുവരും. ജാതി സെന്‍സസിലൂടെ എല്ലാം വ്യക്തമാകും. ബിജെപി എത്രമാത്രം അധികാരം കൈയാളുന്നുവെന്നും നമ്മുടെ പങ്ക് എന്താണെന്നും എല്ലാവര്‍ക്കും മനസിലാകുമെന്നും രാഹുല്‍ കൂട്ടിച്ചേര്‍ത്തു.
വികസനത്തിന്റെ മാതൃകയാണ് ജാതി സെന്‍സസ്. 50 ശതമാനം സംവരണ പരിധിയും ഇല്ലാതാക്കുമെന്നും രാഹുല്‍ വ്യക്തമാക്കി. രാജ്യത്തെ പാര്‍ശ്വവത്കരിക്കപ്പെട്ട 90 ശതമാനത്തിലധികം വരുന്ന ജനങ്ങള്‍ക്ക് നിതീ ഉറപ്പാക്കാനാണ് തങ്ങളുടെ ശ്രമം. ദളിത്, ഒബിസി, ആദിവാസി തുടങ്ങിയ വിഭാഗങ്ങളെ അദാനി കമ്പനി മാനേജ്മെന്റില്‍ കാണാന്‍ സാധിക്കില്ലെന്നും രാഹുല്‍ പരിഹസിച്ചു.