ജിത്തു മാധവന്‍ സംവിധാനം ചെയ്ത് ഫഹദ് ഫാസില്‍ കേന്ദ്ര കഥാപാത്രമായെത്തിയ ആവേശം കേരളത്തിന് അകത്തും പുറത്തും ഒരു പോലെ ജനപ്രീതി നേടിയ ചിത്രമാണ്. ചിത്രം റിലീസ് ചെയ്തതിന് പിന്നാലെ ഫഹദ് ഫാസിലിന്റെ രംഗ എന്ന കഥാപാത്രത്തെയും സജിന്‍ ഗോപു അവതരിപ്പിച്ച അമ്പാനും യുവാക്കള്‍ക്കിടയില്‍ വലിയ തരംഗമാണ്.
സാമൂഹ്യ മാധ്യമങ്ങളിലും രംഗണ്ണന്റെ റീല്‍സ് വലിയ ഹിറ്റാണ്. ഇത്തരത്തില്‍ ആവേശം സിനിമയിലെ സീനിന്റെ റീല്‍സ് ചെയ്യാനായി അങ്കണവാടിയില്‍ അനധികൃതമായി കടന്നുകയറിയ യുവാവിനെതിരെ കേസെടുത്തു. തമിഴ്‌നാട് വെല്ലൂരിലാണ് സംഭവം നടന്നത്. ഡിഎംകെ യൂണിയന്‍ സെക്രട്ടറി ജ്ഞാനശേഖരന്റെ മകന്‍ അന്ന ശരണിനെതിരെയാണ് കേസെടുത്തത്.
ശരണും സുഹൃത്തുക്കളും ചേര്‍ന്ന് അങ്കണവാടിയിലേക്ക് കടന്നുകയറി ചിത്രത്തിലെ ബാര്‍ രംഗമാണ് ചിത്രീകരിച്ചത്. റീല്‍ സാമൂഹ്യ മാധ്യമങ്ങളില്‍ വൈറലായതോടെ അങ്കണവാടിയിലെ വിദ്യാര്‍ത്ഥികളുടെ മാതാപിതാക്കള്‍ പ്രതിഷേധവുമായി രംഗത്തെത്തിയിരുന്നു. ഇതേ തുടര്‍ന്നാണ് ശരണിനെതിരെ പൊലീസ് കേസെടുത്തത്.