തിരഞ്ഞെടുപ്പ് ചട്ടം ലംഘിച്ചതിന് പഞ്ചാബ് മുഖ്യമന്ത്രി ചരണ്‍ജിത് സിംഗ് ചന്നിക്കെതിരെ കേസ്. പെരുമാറ്റ ചട്ടം അനുസരിച്ച് ച്രചാരണത്തിന് അനുവദിച്ചിരിക്കുന്ന സമയത്തേക്കാള്‍ കൂടുതല്‍ നേരം ചന്നി പ്രചാരണം നടത്തിയെന്ന് ആം ആദ്മി പാര്‍ട്ടിയുടെ മന്‍സ മണ്ഡലത്തിലെ സ്ഥാനാര്‍ത്ഥി ഡോ. വിജയ് സിഗ്ലയാണ് പരാതി നല്‍കിയത്.
മന്‍സ മണ്ഡലത്തിലെ കോണ്‍ഗ്രസ് സ്ഥാനാര്‍ത്ഥിയായ ശുഭ്ദീപ് സിംഗ് സിദ്ദു മൂസെവാലക്ക് വേണ്ടി വെള്ളിയാഴ്ച ആറര വരെ ചന്നി പ്രചാരണം നടത്തി എന്നാണ് ആരോപണം. ആറ് മണിവരെയായിരുന്നു പ്രചാരണത്തിന് അനുവദിച്ചിരുന്നത്. മൂസെവാലക്കെതിരെയും കേസെടുത്തിട്ടുണ്ട്. സമയം കഴിഞ്ഞിട്ടും ചന്നിയും മൂസെവാലയും പ്രചാരണം നടത്തുന്നതിന്റെ ദൃശ്യങ്ങള്‍ വിജയ് സിഗ്ല ഫേസ്ബുക്ക് ലൈവിലൂടെ പുറത്ത് വിട്ടിരുന്നു.
മന്‍സ പൊലീസ് സ്റ്റേഷനിലാണ് പരാതി നല്‍കിയിരിക്കുന്നത്. നാളെയാണ് പഞ്ചാബില്‍ നിയമസഭാ തിരഞ്ഞെടുപ്പ് നടക്കുന്നത്.