Connect with us
https://southlive.in/wp-content/uploads/2018/08/728-x-90-pix.jpg

NATIONAL

ഇന്ത്യയിലെ ഏറ്റവും വലിയ ബാങ്ക് തട്ടിപ്പിന്റെ വിശദാംശങ്ങൾ പുറത്തു വരുന്നു, പഞ്ചാബ് നാഷണൽ ബാങ്കിന്റെ മുംബൈ ശാഖയിൽ വൻ തിരിമറി, 11,505 കോടി രൂപ നഷ്ടമായി

, 11:51 am

പഞ്ചാബ് നാഷണൽ ബാങ്കിന്റെ മുംബയിലെ ഒരു ശാഖയിൽ കോടികളുടെ വൻ തട്ടിപ്പ് നടന്നതായി ബാങ്ക് സ്ഥിരീകരിച്ചു. അനധികൃത ഇടപാടുകൾ വഴി 177 കോടി ഡോളറാണ് [11,505 കോടി രൂപ] വിവിധ അക്കൗണ്ടുകളിലേക്ക് മാറ്റിയിരിക്കുന്നത്. ഈ ശാഖയിലെ ഏതാനും ഇടപാടുകാരുടെ അക്കൗണ്ടുകളിലേക്ക് അനധികൃതമായി പണം കൈമാറിയതായി ബാങ്ക് സ്ഥിരീകരിച്ചിട്ടുണ്ട്. ഇന്ത്യൻ ബാങ്കിങ് രംഗത്തെ ഏറ്റവും വലിയ തട്ടിപ്പ് എന്ന് വിശേഷിപ്പിക്കാവുന്ന രീതിയിലാണ് അനുനിമിഷം വിവരങ്ങൾ പുറത്തു വന്നു കൊണ്ടിരിക്കുന്നത്.

ബാങ്കിന്റെ മുംബൈയിലെ ബ്രാഡി ഹൌസ് ശാഖയിലെ ഗോകുൽനാഥ് ഷെട്ടി, ഹനുമന്ത കാരാട്ട് എന്നീ ജീവനക്കാരുടെ സഹായത്തോടെ നിരവ് മോഡി, നിഷാൽ മോഡി, അമി നിരവ് മോഡി, മേഹുൽ ചിനുബായി ചോക്‌സി എന്നിവരുടെ ഉടമസ്ഥതയിലുള്ള കമ്പനികളുടെ അക്കൗണ്ടുകളിലേക്കാണ് പണം പോയിരിക്കുന്നത്. അവർ ഈ പണം വിദേശത്തു പിൻവലിച്ചതായും വ്യക്തമായിട്ടുണ്ട്. ഫെബ്രുവരി അഞ്ചിനാണ് ബാങ്ക് ഇത് സംബന്ധിച്ച വിവരങ്ങൾ പുറത്തു വിടുന്നത്. സി ബി ഐ. കേസെടുത് അന്വേഷണം ആരംഭിച്ചിട്ടുണ്ട്. ഇന്ത്യയിലെ ഏറ്റവും വലിയ പണക്കാരിൽ ഒരാളും പ്രമുഖ ആഭരണ വ്യപാരിയുമായ നിരവ് മോഡിക്കെതിരെ ബാങ്കിനെ തട്ടിച്ചതിന്റെ പേരിൽ മറ്റൊരു കേസും നിലവിലുണ്ട്,

ഈ അക്കൗണ്ടുകളിലെ നിക്ഷേപത്തിന്റെ ബലത്തിൽ മറ്റു ചില ബാങ്കുകൾ ഈ ഇടപാടുകാർക്ക് വിദേശത്തു വായ്പ നൽകിയതായും കണ്ടെത്തിയിട്ടുണ്ട്. ഇത് തട്ടിപ്പിന്റെ വ്യാപ്തി വിപുലമാക്കുന്നു.
ഒരു പത്രകുറിപ്പിലൂടെയാണ് ബാങ്ക് ഇക്കാര്യം വ്യക്തമാക്കിയിരിക്കുന്നത്. അന്വേഷണ ഏജൻസികളെ വിവരം അറിയിച്ചിട്ടുണ്ടെന്ന് മാത്രമാണ് പത്രക്കുറിപ്പിൽ പറയുന്നത്. വാർത്ത പുറത്തു വന്നതോടെ ഇന്ന് രാവിലെ പഞ്ചാബ് നാഷണൽ ബാങ്കിന്റെ ഓഹരി മൂല്യം ഏഴു ശതമാനത്തിലേറെ ഇടിഞ്ഞു. ബാങ്കിന്റെ ഓഹരി നിക്ഷേപകർക്ക് മണിക്കൂറുകൾ കൊണ്ട് 3000 കോടി രൂപയുടെ നഷ്ടം സംഭവിച്ചിരിക്കുകയാണ്. 177 കോടി ഡോളറിന്റെ അനധികൃത ഇടപാടുകൾ ഈ അക്കൗണ്ടുകളിൽ നടന്നതായി ബോംബെ സ്റ്റോക്ക് എക്‌സ്‌ചേഞ്ചിന് നൽകിയ കത്തിൽ ബാങ്ക് അധികൃതർ വ്യക്തമാക്കിയിട്ടുണ്ട്.

Advertisement