ന്യൂയോര്‍ക്ക് ടൈംസ് നല്‍കിയ വാര്‍ത്തക്കെതിരെ അമേരിക്കന്‍ സംരംഭകന്‍ നെവില്ലെ റോയി സിംഘം. ന്യൂയോര്‍ക്ക് ടൈംസ് നല്‍കിയ വ്യാജവാര്‍ത്തയുടെ അടിസ്ഥാനത്തിലാണ് ന്യൂസ്‌ക്ലിക്കിനെതിരെ ഡല്‍ഹി പൊലീസ് യുഎപിഎ നിയമം ചുമത്തി കേസെടുത്തത്.
ചൈനീസ് സര്‍ക്കാരിന്റെ പ്രചാരണാര്‍ഥം റോയി ന്യൂസ്‌ക്ലിക്കില്‍ പണം നിക്ഷേപിച്ചുവെന്ന് ന്യൂയോര്‍ക്ക് ടൈംസ് റിപ്പോര്‍ട്ട് ചെയ്തിരുന്നു. ഇതിനെ തുടര്‍ന്നാണ് ഡല്‍ഹി പൊലീസ് കേസ് എടുത്തത്. എന്നാല്‍, മാധ്യമസ്വാതന്ത്ര്യം ദുരുപയോഗം ചെയ്താണ് ന്യൂയോര്‍ക്ക് ടൈംസ് ഈ റിപ്പോര്‍ട്ട് പ്രസിദ്ധീകരിച്ചതെന്ന് റോയി സിംഘം പറഞ്ഞു.
ചൈനീസ് സര്‍ക്കാരിന്റെയോ കമ്യൂണിസ്റ്റ് പാര്‍ടിയുടെയോ പ്രചാരണ വിഭാഗത്തില്‍നിന്നോ മറ്റേതെങ്കിലും വകുപ്പില്‍നിന്നോ താന്‍ ഫണ്ട് വാങ്ങിയിട്ടില്ലെന്ന് അദേഹം പുറത്തിറക്കിയ പ്രസ്താവനയില്‍ പറയുന്നു. ദീര്‍ഘകാലം ബഹുരാഷ്ട്ര കമ്പനി നടത്തിയ തനിക്ക് ഓരോ രാജ്യത്തെയും നിക്ഷേപനിയമങ്ങള്‍ അറിയാം. ചൈനീസ് കമ്പനികളായ വിവോ, ഷിയോമി എന്നിവയുടെ ഇന്ത്യയിലെ പ്രവര്‍ത്തനങ്ങളുമായി എഫ്ഐആറില്‍ തന്നെ ബന്ധിപ്പിക്കുന്നത് ഞെട്ടിപ്പിക്കുന്നതാണെന്ന് അദ്ദേഹം വ്യക്തമാക്കി.