നടപ്പ് സാമ്പത്തിക വർഷത്തെ രണ്ടാം പാദത്തിൽ രാജ്യത്തെ മൊത്ത ആഭ്യന്തര ഉത്പാദനം (ജിഡിപി) 8.4 ശതമായി ഉയർന്നു. നാഷണൽ സ്റ്റാറ്റിസ്റ്റിക്കൽ ഓഫീസ് (എൻഎസ്ഒ) 2021-22 സാമ്പത്തിക വർഷത്തെ ജൂലൈ – സെപ്റ്റംബർ മാസ കാലയളവിലെ ജിഡിപി നിരക്കാണ് പുറത്ത് വന്നത്. മുൻവർഷം ഇതേ കാലയളവിൽ ജിഡിപിയിൽ 7.4 ശതമാനം ഇടിവാണ് ഉണ്ടായതെങ്കിൽ ഇക്കുറി 8.4 ശതമാനം വർധിച്ചു.
അതേസമയം, ഈ സമ്പത്തിക വർഷത്തിന്റെ ആദ്യ പാദത്തിൽ 20.1 ശതമാനമായിരുന്നു ജിഡിപി നിരക്കിലെ വളർച്ച രേഖപ്പെടുത്തിയിരുന്നത്. 2020-21 സാമ്പത്തിക വർഷത്തിലെ രണ്ടാം പാദത്തിൽ 32.97 ലക്ഷം കോടിയായിരുന്ന ജിഡിപി ഇക്കഴിഞ്ഞ സെപ്തംബർ മാസത്തിൽ അവസാനിച്ച പാദവാർഷികത്തിൽ 35.73 കോടിയായി ഉയർന്നു.
ഖനന മേഖലയിലാണ് കൂടുതൽ കുതിപ്പുണ്ടായിരിക്കുന്നത്. 15.4 ശതമാനം വളർച്ചയാണ് ഈ മേഖലയിൽ നടപ്പ് സാമ്പത്തിക വർഷത്തിന്റെ രണ്ടാം പാദത്തിൽ രേഖപ്പെടുത്തിയിരിക്കുന്നത്. നിർമാണ മേഖല (7.5%), വ്യവസായ ഉത്പാദനം (5.5%), വൈദ്യുതി (8.9%), കാർഷിക മേഖല (4.5%) തുടങ്ങിയവയും സാമ്പത്തിക വളർച്ചയ്ക്ക് ഗണ്യമായ സംഭാവനകൾ നൽകി.
നേരത്തെ, വിപണി വിദഗ്ധർ പ്രതീക്ഷിച്ചിരുന്നത്, രണ്ടാം പാദത്തിൽ 8.1 ശതമാനം വളർച്ച നേടുമെന്നായിരുന്നു. എന്നാൽ പ്രതീക്ഷിച്ചതിനും മുകളിൽ 8.45 ശതമാനം നിരക്കിലാണ് സാമ്പത്തിക വളർച്ച രേഖപ്പെടുത്തിയിരിക്കുന്നത്.
