ഭാര്യയുടെ ഉപദ്രവം സഹിക്കാനാവാതെ നാടുവിട്ട യുവാവിനെ നോയിഡയില്‍ നിന്ന് കണ്ടെത്തി. യുവാവിന്റെ ഭാര്യ നല്‍കിയ പരാതിയെ തുടര്‍ന്ന് ബംഗളൂരു പൊലീസ് നടത്തിയ അന്വേഷണത്തിലാണ് യുവാവിനെ കണ്ടെത്തിയത്. ഓഗസ്റ്റ് 4ന് ബംഗളൂരുവില്‍ നിന്നാണ് യുവാവിനെ കാണാതായത്. എടിഎമ്മില്‍ നിന്ന് പണമെടുക്കാന്‍ പുറത്തുപോയ യുവാവിനെ കാണാതാകുകയായിരുന്നു.
ഇയാളെ ഫോണില്‍ ബന്ധപ്പെടാനും സാധിച്ചിരുന്നില്ല. യുവാവിനെ തട്ടിക്കൊണ്ടുപോയെന്ന നിഗമനത്തിലായിരുന്നു പൊലീസ് അന്വേഷണം. പ്രദേശത്തെ റെയില്‍വേ സ്റ്റേഷനുകള്‍, ബസ് സ്റ്റാന്റുകള്‍ എന്നിവ കേന്ദ്രീകരിച്ച് അന്വേഷണം നടത്തിയെങ്കിലും ഫലമുണ്ടായില്ല. തുടര്‍ന്ന് മൊബൈല്‍ ഫോണ്‍ കേന്ദ്രീകരിച്ച് നടത്തിയ അന്വേഷണത്തിലാണ് യുവാവിനെ കണ്ടെത്തിയത്.
ഇയാളുടെ ഫോണ്‍ നോയിഡയില്‍ സിഗ്നല്‍ കാണിച്ചതിനെ തുടര്‍ന്ന് നടത്തിയ അന്വേഷണത്തില്‍ യുവാവിനെ കണ്ടെത്തുകയായിരുന്നു. നോയിഡയില്‍ നിന്ന് കണ്ടെത്തിയ യുവാവിന്റെ വാക്കുകള്‍ കേട്ട് അന്വേഷണ സംഘം അക്ഷരാര്‍ത്ഥത്തില്‍ ഞെട്ടി. ഭാര്യയോടൊപ്പം ജീവിക്കാന്‍ താത്പര്യമില്ലാത്തത് കാരണമാണ് താന്‍ നാടുവിട്ടതെന്നും തന്നെ ജയിലിലേക്ക് അയച്ചോളൂവെന്ന് പറഞ്ഞ യുവാവ് ഭാര്യയ്‌ക്കൊപ്പം ജീവിക്കാന്‍ താത്പര്യമില്ലെന്നും അറിയിച്ചു. എന്നാല്‍ പൊലീസ് ഇയാളെയും കൂട്ടി നാട്ടില്‍ തിരിച്ചെത്തി.