റെയില്‍വേ സ്റ്റേഷനിലെ അപകടത്തിന്റെ ദൃശ്യങ്ങള്‍ നീക്കാന്‍ ആവശ്യപ്പെട്ട് എക്സിന് നോട്ടീസ് അയച്ച് റെയില്‍വേ മന്ത്രാലയം. ന്യൂഡല്‍ഹി റെയില്‍വേ സ്റ്റേഷനില്‍ ഫെബ്രുവരി 15ന് നടന്ന അപകടത്തിന്റെ ദൃശ്യങ്ങള്‍ ഉള്‍പ്പെടുന്ന ലിങ്കുകള്‍ നീക്കം ചെയ്യാന്‍ ആവശ്യപ്പെട്ടാണ് നോട്ടീസ്. തിക്കിലും തിരക്കിലുംപെട്ട് യാത്രക്കാര്‍ മരിച്ച സംഭവത്തിന്റെ ദൃശ്യങ്ങള്‍ക്കാണ് വിലക്കേര്‍പ്പെടുത്തിയത്.
അപകടത്തിന്റെ ദൃശ്യങ്ങള്‍ അടങ്ങുന്ന 285 ലിങ്കുകള്‍ പിന്‍വലിക്കാനാണ് നോട്ടീസ് അയച്ചിരിക്കുന്നത്. ദൃശ്യങ്ങള്‍ സാമൂഹിക മാധ്യമങ്ങളില്‍ പ്രചരിക്കുന്നതിന്റെ ധാര്‍മ്മിക പ്രശന്ങ്ങള്‍ ചൂണ്ടിക്കാട്ടിയാണ് ഫെബ്രുവരി 17ന് റെയില്‍വേ എക്സിന് നോട്ടീസ് അയച്ചത്. 36 മണിക്കൂറിനുള്ളില്‍ നടപടി സ്വീകരിക്കാനാണ് നിര്‍ദ്ദേശം.
എക്‌സിന്റെ നയങ്ങള്‍ക്ക് എതിരാണ് ഇത്തരത്തിലുള്ള ദൃശ്യങ്ങളെന്നും ഇത് റെയില്‍വേയുടെ പ്രവര്‍ത്തനത്തെ ബാധിക്കുമെന്നും നോട്ടീസില്‍ പറയുന്നു. മഹാകുംഭമേള നടക്കുന്ന പ്രയാഗ് രാജിലേക്കുള്ള രണ്ട് ട്രെയിനുകള്‍ സ്റ്റേഷനിലെത്തിയ സമയത്തുണ്ടായ അപകടത്തില്‍ സ്ത്രീകളും കുട്ടികളുമടക്കം 18 പേരാണ് മരിച്ചത്.
