നിയമസഭയില്‍ കൂറുമാറുന്ന എംഎല്‍എമാരെ പൂട്ടാന്‍ പുതിയ നിയമ നിര്‍മ്മാണവുമായി ഹിമാചല്‍ പ്രദേശ്. കോണ്‍ഗ്രസ് ഭരിക്കുന്ന ഹിമാചല്‍ പ്രദേശ് നിയമസഭയില്‍ അതരിപ്പിച്ച ബില്‍ അനുസരിച്ച് ഇനി കൂറുമാറുന്ന എംഎല്‍എമാര്‍ പെന്ഷന് അര്‍ഹരല്ല. കൂറുമാറ്റ നിരോധന നിയമം അനുസരിച്ച് അയോഗ്യരാക്കപ്പെടുന്നവരെയാണ് പെന്ഷന് അനര്‍ഹരായി കണക്കാക്കുക.
ഇതുസംബന്ധിച്ച് സഭയില്‍ അവതരിപ്പിച്ച ബില്ല് പാസായി. മുഖ്യമന്ത്രി സുഖ്‌വിന്ദര്‍ സിംഗ് സുഖു കഴിഞ്ഞ ദിവസമാണ് സഭയില്‍ ബില്ല് അവതരിപ്പിച്ചത്. ഭരണഘടനയുടെ പത്താം ഷെഡ്യൂള്‍ അനുസരിച്ച് ഏതെങ്കിലും ഘട്ടത്തില്‍ അയോഗ്യനാക്കപ്പെട്ടാല്‍ നിയമപ്രകാരം ആ വ്യക്തിയ്ക്ക് പെന്ഷന് അര്‍ഹതയില്ലെന്ന് കൂറുമാറ്റ നിരോധന നിയമം പരാമര്‍ശിച്ച് ബില്ലില്‍ പറയുന്നു.
ഹിമാചല്‍ പ്രദേശ് നിയമസഭ ഭേദഗതി ബില്‍ 2024 എന്നാണ് ബില്ലിന് നല്‍കിയിരിക്കുന്ന പേര്. നേരത്തെ നിയമസഭയില്‍ നടന്ന ബജറ്റ് അവതരണത്തില്‍ നിന്ന് വിട്ടുനിന്ന ആറ് എംഎല്‍എമാരെ അയോഗ്യരാക്കിയിരുന്നു. ആറ് പേരും പിന്നീട് ഉപതിരഞ്ഞെടുപ്പില്‍ മത്സരിച്ചെങ്കിലും രണ്ട് പേര്‍ക്ക് മാത്രമാണ് സഭയില്‍ തിരിച്ചെത്താനായത്.