ഇന്ത്യയിൽ 10 വയസിന് മുകളിൽ പ്രായമുള്ള 15 വ്യക്തികളിൽ ഒരാൾ കോവിഡ് ബാധിതൻ. ഇന്ത്യൻ കൗൺസിൽ ഓഫ് മെഡിക്കൽ റിസർച്ച് നടത്തിയ സിറോ സർവേയിലാണ് കണ്ടെത്തല്‍. ചേരികളിലും ചേരികളല്ലാത്ത പ്രദേശങ്ങളിലും ഗ്രാമീണ മേഖലയേക്കാൾ കൂടുതൽ വൈറസ് സാന്നിദ്ധ്യം കണ്ടെത്തിയതായി ഐസിഎംആർ ഡയറക്ടർ ജനറൽ ബൽറാം ഭാർഗിവ അറിയിച്ചു.
രാജ്യത്തിൻറെ വിവിധ ഭാഗങ്ങളിൽ നിന്ന് 29082 പേരെയാണ് രണ്ടാം സിറോ സർവേയിൽ പരിശോധനക്ക്ര് വിധേയമാക്കിയത്. സർവേയിൽ നഗരത്തിലെ ചേരികളിൽ 15.6 ശതമാനമാണം വൈറസ് സാന്നിദ്ധ്യം കണ്ടെത്തി. ചേരിയല്ലാത്ത പ്രദേശങ്ങളിൽ വൈറസ് സാന്നിദ്ധ്യം 8.2 ശതമാനമാണ്. രാജ്യത്തെ മുതിർന്ന ജനസംഖ്യയുടെ 7.1 ശതമാനം പേർക്ക് കോവിഡ് ബാധിച്ചുവെന്നും സിറോ സർവേ സൂചിപ്പിക്കുന്നു. രോഗം അതിരൂക്ഷമായി തുടരുന്ന സാഹചര്യമായതിനാൽ കൂടുതൽ മുൻകരുതലുകൾ സ്വീകരിക്കണമെന്നും ഐസിഎംആർ നിർദേശിച്ചു. വരാനിരിക്കുന്ന മാസങ്ങളിൽ ജനങ്ങൾ ധാരാളം ഒത്തുകൂടുന്ന ഉത്സവങ്ങളും തിരഞ്ഞെടുപ്പുകളും നടക്കാനുള്ള സാഹചര്യത്തിലാണ് നിർദേശം.
ഓഗസ്റ്റ് 17 മുതൽ സെപ്റ്റംബർ 22 വരെ നടന്ന സർവേയിൽ 6.6 ശതമാനം ആളുകളുടെയും പരിശോധനാഫലം പോസിറ്റീവായതായി സൂചന നൽകുന്നു. പ്രായപൂർത്തി ആയവരിൽ 7.1 ശതമാനം പേർക്കും കോവിഡ് വന്നതായും സർവേ ഫലം വ്യക്തമാക്കി.