ബിജെപിയില്‍ ചേര്‍ന്നേക്കുമെന്ന വാര്‍ത്തകള്‍ മാധ്യമ സൃഷ്ടിയാണെന്ന് മുതിര്‍ന്ന കോണ്‍ഗ്രസ് നേതാവും മുന്‍ മധ്യപ്രദേശ് മുഖ്യമന്ത്രിയുമായ കമല്‍നാഥ്. താന്‍ ബിജെപിയില്‍ ചേര്‍ന്നേക്കുമെന്ന തരത്തില്‍ പ്രചരിക്കുന്ന വാര്‍ത്തകളെ മാധ്യമഭ്രാന്തെന്ന് വിശേഷിപ്പിച്ച് നിഷേധിക്കുകയായിരുന്നു കമല്‍നാഥ്.
കഴിഞ്ഞ ദിവസം മധ്യപ്രദേശിലെ ചിന്ദ്വാര ജില്ലയില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു കമല്‍നാഥ്. താന്‍ എപ്പോഴെങ്കിലും ഇത്തരത്തില്‍ പറഞ്ഞിട്ടുണ്ടോ, എന്തെങ്കിലും സൂചന ഇത് സംബന്ധിച്ച് നല്‍കിയിട്ടുണ്ടോയെന്നും കമല്‍നാഥ് മാധ്യമങ്ങളോട് ചോദിച്ചു. ഇത്തരം വാര്‍ത്തകള്‍ മാധ്യമ സൃഷ്ടിയാണെന്നും മുന്‍ മുഖ്യമന്ത്രി കൂട്ടിച്ചേര്‍ത്തു.
Read more
അതേ സമയം സംസ്ഥാനത്തിന്‍മേലുള്ള കടബാധ്യതയെ ചൊല്ലി ബിജെപി സര്‍ക്കാരിനെ വിമര്‍ശിച്ച കമല്‍നാഥ് സര്‍ക്കാര്‍ വായ്പകളില്‍ മാത്രമാണ് പ്രവര്‍ത്തിക്കുന്നതെന്നും അഭിപ്രായപ്പെട്ടു. സംസ്ഥാനത്ത് മഴയിലും ആലിപ്പഴവീഴ്ചയിലും ഉണ്ടായ കാര്‍ഷിക നഷ്ടങ്ങള്‍ക്ക് അര്‍ഹമായ നഷ്ട പരിഹാരം മുഖ്യമന്ത്രിയോട് ആവശ്യപ്പെടുമെന്നും അറിയിച്ചു.
