ചാണകത്തിൽ നിന്ന് ഉത്പാദിപ്പിക്കുന്ന ഖാദി പ്രകൃതിക് പെയിന്റിന്റെ ബ്രാൻഡ് അംബാസഡറാകുമെന്നും രാജ്യമെമ്പാടും ഇത് പ്രോത്സാഹിപ്പിക്കുമെന്നും കേന്ദ്ര എംഎസ്എംഇ മന്ത്രി നിതിൻ ഗഡ്കരി. ചാണകത്തിൽ നിന്നുള്ള പെയിന്റ് നിർമ്മാണം ഏറ്റെടുക്കാൻ യുവ സംരംഭകരെ പ്രോത്സാഹിപ്പിക്കുകയാണ് ലക്ഷ്യമെന്നും നിതിൻ ഗഡ്കരി പറഞ്ഞു.
ഈ പെയിന്റിന്റെ ജയ്പൂരിലെ പുതിയ ഓട്ടോമേറ്റഡ് മാനുഫാക്ചറിംഗ് യൂണിറ്റ് ഉദ്ഘാടനം ചെയ്ത അദ്ദേഹം, രാജ്യത്തെ ഗ്രാമീണ, കാർഷിക അധിഷ്ഠിത സമ്പദ്‌വ്യവസ്ഥയെ ശാക്തീകരിക്കുന്നതിന് ഇത് വളരെയധികം ഉപകരിക്കുമെന്ന് പറഞ്ഞു.
ചാണകത്തിൽ നിന്ന് നിർമ്മിച്ച ഇന്ത്യയിലെ ആദ്യത്തെ ഒരേയൊരു പെയിന്റാണിതെന്ന് മന്ത്രാലയം പ്രസ്താവനയിൽ പറഞ്ഞു.
ലക്ഷക്കണക്കിന് കോടി രൂപയുടെ അടിസ്ഥാന സൗകര്യ പദ്ധതികളുടെ ഉദ്ഘാടനത്തേക്കാൾ സന്തോഷകരവും സംതൃപ്‌തികരവുമാണ് ഈ ഉൽപാദന യൂണിറ്റിന്റെ ഉദ്ഘാടനം എന്ന് കേന്ദ്ര മന്ത്രി പറഞ്ഞു.
“ദരിദ്രരിൽ ദരിദ്രരായവരുടെ പ്രയോജനത്തിനായി സുസ്ഥിര വികസനം സൃഷ്ടിക്കുന്നതിന് ഖാദി പ്രകൃതിക് പെയിന്റിന് കഴിയും, ഓരോ ഗ്രാമത്തിലും ഖാദി പ്രകൃതിക് പെയിന്റ് യൂണിറ്റ് സ്ഥാപിക്കുകയാണ് ലക്ഷ്യം,” ഗഡ്കരിയെ ഉദ്ധരിച്ച് മന്ത്രാലയം അറിയിച്ചു.
ജയ്പൂരിലെ കുമാരപ്പ നാഷണൽ ഹാൻഡ്‌മെയ്ഡ് പേപ്പർ ഇൻസ്റ്റിറ്റ്യൂട്ടിന്റെ കാമ്പസിലാണ് പുതിയ പ്ലാന്റ് സ്ഥാപിച്ചത്. പുതിയ യൂണിറ്റ് കമ്മീഷൻ ചെയ്യുന്നത് പെയിന്റിന്റെ ഉൽപാദന ശേഷി ഇരട്ടിയാക്കും. നിലവിൽ പ്രതിദിനം 500 ലിറ്റർ ഉത്പാദനം നടത്തുന്നു, ഇത് പ്രതിദിനം 1,000 ലിറ്റർ വരെ ഉയരും.
“ഡിസ്റ്റെംപർ, എമൽഷൻ എന്നീ രണ്ട് വേരിയന്റുകളിൽ പെയിന്റ് ലഭ്യമാണ്; ആൻറി ബാക്ടീരിയൽ, ആൻറി ഫംഗസ്, പ്രകൃതി താപ ഇൻസുലേഷൻ പ്രോപ്പർട്ടികൾ പോലുള്ള എട്ട് പ്രയോജനങ്ങൾ അഥവാ “അഷ്ടലാഭ്” ഖാദി പ്രകൃതിക് പെയിന്റിൽ അടങ്ങിയിരിക്കുന്നു എന്നാണ് സർക്കാർ പറയുന്നത്. ഈ പെയിന്റ് പരിസ്ഥിതി സൗഹൃദവും വിഷരഹിതവും മണമില്ലാത്തതും ചെലവ് കുറഞ്ഞതുമാണെന്നും സർക്കാർ അവകാശപ്പെട്ടു.