പുരുഷൻമാർ തമ്മിൽ വിവാഹം കഴിച്ചാൽ എങ്ങനെ കുട്ടികളുണ്ടാകുമെന്ന് ചോദിച്ച് ബിഹാർ മുഖ്യമന്ത്രി നിതീഷ് കുമാർ. സ്ത്രിധനത്തിനെതിരായി സംസാരിക്കുന്നതിനിടെയിലായിരുന്നു നിതീഷ് കുമാറിന്റെ വിവാദ പരാമർശം. തിങ്കളാഴ്ച പട്‌നയിൽ പുതിയ വനിതാ ഹോസ്റ്റൽ ഉദ്ഘാടനം ചെയ്തുകൊണ്ട് സംസാരിക്കവെയാണ്, സ്വവർഗ വിവാഹങ്ങളെയും എതിർത്തുകൊണ്ട് ഹോമോഫോബിക്കായി നിതീഷ് കുമാർ സംസാരിച്ചത്.
പ്രസംഗത്തിനിടയിൽ സ്ത്രീധനത്തിനെതിരായി സംസാരിക്കന്നതിനിടയിലായിരുന്നു സ്വവർഗാനുരാഗികളെ അപമാനിക്കുന്ന തരത്തിലുള്ള ബിഹാർ മുഖ്യമന്ത്രിയുടെ പ്രസ്താവന.’ബാല വിവാഹത്തിനും സ്ത്രീധനത്തിനും എതിരെ ഞങ്ങൾ ക്യാംപെയിൻ ആരംഭിച്ചിട്ടുണ്ട്. വിവാഹത്തിന് സ്ത്രീധനം വാങ്ങുന്ന അത്രയും മോശമായ കാര്യം വേറെ ഇല്ല.
കല്യാണം കഴിച്ചാൽ മാത്രമേ നിങ്ങൾക്ക് കുട്ടികളുണ്ടാകൂ, ഇവിടെ കൂടിയിരിക്കുന്ന നമ്മളെല്ലാവരും അമ്മമാർക്ക് ജനിച്ചവരാണ്. ആണും ആണും തമ്മിൽ കല്യാണം കഴിക്കുകയാണെങ്കിൽ പിന്നെ കുട്ടികളുണ്ടാകുമോ എന്നും ആരെങ്കിലും ജനിക്കുമോ’ എന്നായിരുന്നു പ്രസംഗത്തിൽ നിതീഷ് കുമാർ പരാമർശിച്ചത്.
സ്ത്രീധനം വാങ്ങിയിട്ടില്ല എന്ന് വരന്റെ ആളുകൾ പ്രഖ്യപിച്ചാൽ മാത്രമേ താൻ വിവാഹത്തിൽ പങ്കെടുക്കുകയുള്ളൂവെന്നും സ്ത്രീകളുടെ അഭ്യർത്ഥന മാനിച്ചാണ് സംസ്ഥാനത്ത് മദ്യം നിരോധിച്ചതെന്നും നിതീഷ് കുമാർ പ്രസംഗത്തിനിടെ പറഞ്ഞു. നിതീഷ് കുമാറിന്റെ പ്രസ്താവന എ.എൻ.ഐ അവരുടെ ട്വിറ്റർ പേജിലൂടെ പങ്കുവെക്കുകയും ചെയ്തിട്ടുണ്ട്.