രാജ്യം ഇനി 5ജി യുഗത്തിലേക്ക്. അഞ്ചാം തലമുറയുടെ സേവനം ലഭ്യമാക്കുന്നതിന് വേണ്ടി 5 ജി സ്പെക്ട്രം ലേലം ഇന്ന് ആരംഭിക്കും. വൊഡഫോണ്‍ ഐഡിയ, ഭാരതി എയര്‍ടെല്‍, മുകേഷ് അംബാനിയുടെ റിലയന്‍സ് ജിയോ, അദാനി ഡേറ്റ എന്നീ വന്‍കിട കമ്പനികളാണ് ലേലത്തില്‍ പങ്കെടുക്കും.
4ജിയെക്കാള്‍ പത്തിരട്ടി വേഗമുള്ളതും 3 ജിയേക്കാള്‍ 30 മടങ്ങ് വേഗമുള്ളതുമാണ് 5 ജി. 72 ഗിഗാഹെര്‍ഡ്‌സ് ആണ് 20 വര്‍ഷത്തേക്ക് ലേലം ചെയ്യുന്നത്. ലേലം നേടുന്നവര്‍ക്ക് സ്പെക്ട്രം ഉപയോഗിക്കാനുള്ള ലൈസന്‍സ് അവകാശം 20 വര്‍ഷത്തിലേക്കായിരിക്കും ലഭിക്കുക.
ഈ ലേലത്തിലൂടെ കേന്ദ്രസര്‍ക്കാര്‍ ഒന്നരലക്ഷം കോടിയോളം രൂപയാണ് വരുമാനമായി പ്രതീക്ഷിക്കുന്നത്.
ഇന്ന് രാവിലെ 10 മണിക്കാണ് ലേല പ്രക്രിയകള്‍ ആരംഭിക്കുന്നത്. വൈകുന്നേരം 6 മണിവരെ ഇത് നീണ്ടു നില്‍ക്കും. പ്രധാനമന്ത്രിയുെട അധ്യക്ഷതയില്‍ കഴിഞ്ഞ മാസം ചേര്‍ന്ന യോഗത്തിലാണ് 5 ജി ലേലനടപടികള്‍ ആരംഭിക്കുന്നത് സംബന്ധിച്ച് ധാരണയായത്. ടെലികോം മന്ത്രാലയമാണ് ലേലം നടത്തുന്നത്.
ലേലത്തില്‍ പങ്കെടുക്കുന്ന നാല് കമ്പനികളും കൂടി ഏണസ്റ്റ് മണി ഡെപ്പോസിറ്റായി 21,800 കോടി രൂപ ലേലത്തിലേക്ക് നിക്ഷേപിച്ചിട്ടുണ്ട്. റിലയന്‍സ് ജിയോ ഏറ്റവും കൂടിയ തുകയായ 14,000 കോടിയും എയര്‍ടെല്‍ 5,500 , വൊഡാഫോണ്‍ ഐഡിയ 2,200 കോടിയും നിക്ഷേപിച്ചു. നൂറ് കോടി രൂപ മാത്രമാണ് അദാനി ഗ്രൂപ്പ് എഎംഡിയായി നിക്ഷേപിച്ചത്. ഇന്ത്യയില്‍ ആദ്യഘട്ടത്തില്‍ 13 നഗരങ്ങളിലാണേ് 5 ജി സേവനം ലഭ്യമാവുക. ഗുജറാത്തിലെ അഹമ്മദാബാദിലും ജാംനഗറിലും ഗാന്ധിനഗറിലും ആദ്യംതന്നെ ലഭിക്കും. ബംഗളൂരു, ഛണ്ഡീഗഢ്, ഡല്‍ഹി, ഹൈദരാബാദ്, പുണെ, ലഖ്നോ, മുംബൈ, കൊല്‍ക്കത്ത നഗരങ്ങളും പട്ടികയിലുണ്ട്.
