പ്രധാന മന്ത്രി നരേന്ദ്രമോദിയുടെ അധിക്ഷേപങ്ങൾ താൻ ചെയ്യുന്നത് ശരിയെന്നതിന് തെളിവെന്ന് കോൺഗ്രസ് നേതാവ് രാഹുൽഗാന്ധി എംപി. ‘വിഡ്ഢികളുടെ നേതാവ്’ പരാമർശത്തിലാണ് മോദിയ്ക്ക് മറുപടിയുമായി രാഹുൽ എത്തിയത്. പ്രധാനമന്ത്രി തന്നെ നിരന്തരം അപകീർത്തിപ്പെടുത്തുന്നതിൽ ആശങ്കയില്ലെന്നും രാഹുൽ കൂട്ടിച്ചേർത്തു.
‘പ്രധാനമന്ത്രി മോദി എന്നെ നിരന്തരം അപകീർത്തിപ്പെടുത്തുകയാണ്. ഞാൻ അതൊന്നും കാര്യമാക്കുന്നില്ല. അദ്ദേഹം അങ്ങനെ തന്നെ സംസാരിക്കുന്നത് നല്ലതാണ്. കാരണം അദ്ദേഹം അങ്ങനെ സംസാരിക്കുമ്പോൾ താൻ ചെയ്യുന്നത് ശരിയാണെന്ന് എനിക്ക് തോന്നും’- രാഹുൽ പറഞ്ഞു.അദാനി ഗ്രൂപ്പിന് മോദി സർക്കാർ നൽകുന്ന അത്രയും പണം, രാജ്യത്തെ പാവപ്പെട്ടവർക്ക് നൽകുകയാണ് തന്റെ ലക്ഷ്യമെന്നും രാഹുൽ ഗാന്ധി പറഞ്ഞു.
‘യഥാർത്ഥ രാഷ്ട്രീയം ശതകോടീശ്വരന്മാരെ സഹായിക്കാനുള്ളതല്ലെന്ന് ഞാൻ നിങ്ങൾക്ക് കാണിച്ചുതരാം. തൊഴിൽരഹിതരെയും കർഷകരെയും ചെറുകിട കച്ചവടക്കാരെയും സഹായിക്കുന്നതിലൂടെയാണ് യഥാർത്ഥ രാഷ്ട്രീയം സംഭവിക്കുന്നത് — ഞാൻ നിങ്ങൾക്ക് കാണിച്ചുതരാം’- രാഹുൽ പറഞ്ഞു.ഛത്തീസ്ഗഡിലെ തെരഞ്ഞെടുപ്പ് റാലിയിൽ സംസാരിക്കുകയായിരുന്നു രാഹുൽ
