പാര്‍ലമെന്റിന്റെ വര്‍ഷകാല സമ്മേളനത്തിന്റെ അവസാന ദിനവും സഭയിലരങ്ങേറിയത് നാടകീയ രംഗങ്ങള്‍. പ്രതിപക്ഷം പെഗാസസ് വിഷയത്തില്‍ ചര്‍ച്ച ആവശ്യപ്പെട്ട് പ്രതിഷേധം ഉയര്‍ത്തിയതോടെ ലോകസഭ അനശ്ചിതകാലത്തേക്ക് പിരിഞ്ഞു. അതേസമയം രാജ്യസഭയില്‍ അത്യന്തം വൈകാരികമായായിരുന്നു ഉപരാഷ്ട്രപതിയുടെ പ്രസംഗം. സഭയിലെ ബഹളത്തിനിടെ ഉപരാഷ്ട്രപതി വെങ്കയ്യ നായിഡു വിങ്ങിക്കരയുകയായിരുന്നു.
സഭയിലെ അവസ്ഥയില്‍ താന്‍ ദുഖിതനാണ്. ഈ ബഹളങ്ങള്‍ ഏറെ അലോസരപ്പെടുത്തുന്നു. കഴിഞ്ഞ രാത്രിയില്‍ ഉറങ്ങാനായില്ല, കാരണം കര്‍ഷകരുടെ അവസ്ഥ ചര്‍ച്ച ചെയ്യേണ്ടതായിരുന്നു. സഭയുടെ പരിപാവനത ചില അംഗങ്ങള്‍ തകര്‍ത്തു. ഈ നടപടികളൊക്കെ പൊതു ജനം കാണുന്നുണ്ടെന്നും അദ്ദേഹം കൂട്ടിച്ചേര്‍ത്തു.
പവിത്രത കല്പിക്കുന്ന സ്ഥലത്ത് അതിന്റെ ശുദ്ധി നശിപ്പിക്കുന്ന വിധത്തിലുള്ള സംഘര്‍ഷമാണ് നടക്കുന്നതെന്നും ചെയര്‍മാന്‍ പറഞ്ഞു. പ്രതിപക്ഷ ബഹളത്തിനിടെ സഭ 12 മണിവരെ നിര്‍ത്തിവച്ചു.