കൊല്‍ക്കത്ത ആര്‍ജി കര്‍ മെഡിക്കല്‍ കോളജ് ആശുപത്രിയില്‍ യുവ വനിത ഡോക്ടര്‍ ബലാത്സംഗത്തിനിരയായി കൊല്ലപ്പെട്ട കേസില്‍ തൃണമൂല്‍ കോണ്‍ഗ്രസ് എംഎല്‍എയുടെ വീട്ടില്‍ സിബിഐ റെയ്ഡ്. തൃണമൂല്‍ കോണ്‍ഗ്രസ് എംഎല്‍എ ഡോ സുദീപ്‌തോ റോയിയുടെ വീട്ടിലും നഴ്‌സിംഗ് ഹോമിലുമാണ് സിബിഐ റെയ്ഡ് നടത്തിയത്.
കഴിഞ്ഞ ദിവസം ഉച്ചയ്ക്ക് ആയിരുന്നു സുദീപ്‌തോ റോയിയുടെ വീട്ടിലും നഴ്‌സിംഗ് ഹോമിലും സിബിഐ പരിശോധന നടത്തിയത്. ഉച്ചയ്ക്ക് ഒരു മണിയോടെ ആരംഭിച്ച റെയ്ഡ് ഒന്നര മണിക്കൂര്‍ നീണ്ടുനിന്നു. ഡോക്ടര്‍ കൊല്ലപ്പെട്ട ആര്‍ജി കര്‍ മെഡിക്കല്‍ കോളേജിലെ പേഷ്യന്റ് വെല്‍ഫെയര്‍ അസോസിയേഷന്‍ ചെയര്‍മാന്‍ കൂടിയാണ് എംഎല്‍എ.
ആര്‍ജി കര്‍ മെഡിക്കല്‍ കോളേജ് ആശുപത്രിയില്‍ യുവ ഡോക്ടറുടെ മൃതദേഹം കണ്ടെത്തി മണിക്കൂറുകള്‍ക്കുള്ളില്‍ മുന്‍ പ്രിന്‍സിപ്പല്‍ ഡോ സന്ദീപ് ഘോഷ് എംഎല്‍എയെ ഫോണില്‍ ബന്ധപ്പെട്ടതായി സിബിഐ കണ്ടെത്തിയിരുന്നു. ഇതേ തുടര്‍ന്നാണ് എംഎല്‍എയുടെ വസതിയിലും നഴ്‌സിംഗ് ഹോമിലും റെയ്ഡ് നടത്തിയത്.
ഹൂഗ്ലി ജില്ലയിലെ ശ്രീറാംപൂരില്‍ നിന്നുള്ള എംഎല്‍എയാണ് ഡോ സുദീപ്‌തോ റോയി. സിബിഐയുടെ റെയ്ഡിന് പിന്നാലെ അന്വേഷണവുമായി സഹകരിക്കാന്‍ തയ്യാറാണെന്ന് അറിയിച്ച് എംഎല്‍എ പത്രസമ്മേളനം നടത്തി.