പശ്ചിമ ബംഗാള്‍ ഗവര്‍ണര്‍ സിവി ആനന്ദബോസിനെതിരെ രാജ്ഭവനിലെ ജീവനക്കാരി ഉന്നയിച്ച ലൈംഗികാരോപണത്തില്‍ നിയമോപദേശം തേടി പൊലീസ്. സിവി ആനന്ദബോസിനെതിരെ ഇതുവരെ കേസെടുത്തിട്ടില്ലെന്ന് പൊലീസ് അറിയിച്ചു. രാജ്ഭവനിലെ ഓഫീസില്‍ വച്ച് രണ്ട് തവണ പീഡിപ്പിച്ചെന്നാണ് ഗവര്‍ണര്‍ക്കെതിരെയുള്ള പരാതി.
കല്‍ക്കത്ത ഹരേ സ്ട്രീറ്റ് പൊലീസ് സ്റ്റേഷനിലാണ് പരാതി നല്‍കിയത്. ഗവര്‍ണര്‍ക്കെതിരെയുള്ള പരാതിയുടെ വിശദാംശങ്ങള്‍ സാഗരികഘോഷ് എംപി ഉള്‍പ്പെടെയുള്ള തൃണമൂല്‍ കോണ്‍ഗ്രസ് നേതാക്കളാണ് പുറത്തുവിട്ടത്. അതേസമയം ആരോപണം അടിസ്ഥാനരഹിതമാണെന്നാണ് ഗവര്‍ണറുടെ വാദം.
സംഭവത്തില്‍ ഗവര്‍ണര്‍ക്ക് പിന്തുണ നല്‍കി രാജ്ഭവന്‍ ജീവനക്കാര്‍ രംഗത്ത് വന്നിട്ടുണ്ട്. ജോലിയില്‍ വീഴ്ച വരുത്തിയതിന് ജീവനക്കാരിയെ ഗവര്‍ണര്‍ താക്കീത് നല്‍കിയിരുന്നു. ജീവനക്കാരി ഇതില്‍ ഗവര്‍ണറോട് പക തീര്‍ക്കുകയായിരുന്നെന്നാണ് രാജ്ഭവന്‍ ജീവനക്കാര്‍ ആരോപിക്കുന്നത്.
