ഇന്ത്യയിലെ അതിവേഗ ട്രെയിനായ വന്ദേഭാരത് എക്‌സ്പ്രസിന് നേരെ മൈസൂരില്‍ ഉണ്ടായ കല്ലേറില്‍ അന്വേഷണം വ്യാപിപ്പിച്ചു. റെയില്‍വേ പൊലീസും മൈസൂര്‍ പൊലീസും സംയുക്തമായാണ് അന്വേഷണം നടത്തുന്നത്. കഴിഞ്ഞ ദിവസമാണ് മൈസൂരു-ചെന്നൈ വന്ദേഭാരത് എക്‌സ്പ്രസിന് നേരെ കല്ലേറ് ഉണ്ടായത്. കല്ലേറില്‍ ട്രെയിനിന്റെ മൂന്നു ചില്ലുകള്‍ പൂര്‍ണമായും തകര്‍ന്നിരുന്നു. ഇവ മാറ്റിയാണ് ട്രെയിന്‍ ഇപ്പോള്‍ സര്‍വീസ് നടത്തുന്നത്. കഴിഞ്ഞ ദിവസംഉച്ചയ്ക്ക് ബെംഗളൂരു കന്റോണ്‍മെന്റ് കെആര്‍ പുരം സ്റ്റേഷനുകള്‍ക്കിടയിലാണ് സംഭവം. മൈസൂരുവില്‍ നിന്ന് ചെന്നൈയിലേക്ക് പോകുന്ന ട്രെയിന്‍ കെഎസ്ആര്‍ റെയില്‍വേ സ്റ്റേഷനില്‍ നിന്ന് പുറപ്പെട്ട് 10 മിനിറ്റിനുള്ളിലായിരുന്നു കല്ലേറ്.
നവംബറില്‍ സര്‍വീസ് ആരംഭിച്ച മൈസൂരുചെന്നൈ വന്ദേഭാരത് എക്‌സ്പ്രസിന് നേരെ ആദ്യമായാണ് കല്ലേറുണ്ടാകുന്നത്. ദക്ഷിണ പശ്ചിമ റെയില്‍വേ ബെംഗളൂരു ഡിവിഷന് കീഴില്‍ കഴിഞ്ഞ മാസം മാത്രം ട്രെയിനുകള്‍ക്ക് നേരെ കല്ലേറിഞ്ഞതിന് 21 കേസുകളാണ് ആര്‍പിഎഫ് റജിസ്റ്റര്‍ ചെയ്തത്. വന്ദേഭാരത് എക്‌സ്പ്രസിന് നേരെയുള്ള കല്ലേറിന് പിന്നില്‍ സ്വകാര്യ ബസ് ലോബിയാണെന്നും ആരോപണം ഉയര്‍ന്നിട്ടുണ്ട്. ട്രെയിനുകള്‍ക്ക് നേരെ കല്ലെറിയുന്നത് വര്‍ധിച്ചതോടെ ശിക്ഷാ നടപടികളും കര്‍ശനമാക്കിയിട്ടുണ്ട്. ജാമ്യമില്ലാ വകുപ്പ് പ്രകാരം കേസെടുക്കും. യാത്രക്കാര്‍ക്ക് പരുക്കേല്‍ക്കുന്ന കേസുകളില്‍ ജീവപര്യന്തം തടവ് വരെ ശിക്ഷ ലഭിക്കും.
ബെംഗളൂരു നഗരത്തില്‍ ഓടിക്കൊണ്ടിരിക്കുന്ന ട്രെയിനുകള്‍ക്ക് നേരെ കല്ലേറ് വ്യാപകമായിട്ടുണ്ട്. കഴിഞ്ഞ 2 മാസത്തിനിടെ ദക്ഷിണ പശ്ചിമ റെയില്‍വേ ബെംഗളൂരു ഡിവിഷന് കീഴില്‍ റജിസ്റ്റര്‍ ചെയ്തത് 34 കേസുകള്‍. ഇന്നലെ ചെന്നൈമൈസൂരു വന്ദേഭാരത് എക്‌സ്പ്രസിന് നേരെയുണ്ടായ കല്ലേറാണ് ഒടുവിലത്തേത്. ലൊട്ടഗോലഹള്ളികോടിഗേഹള്ളി, ബയ്യപ്പനഹള്ളിചന്നസന്ദ്ര, ചന്നസന്ദ്രയെലഹങ്ക, ചിക്കബാനവാരയശ്വന്ത്പുര എന്നീ റൂട്ടുകളിലാണ് കല്ലേറ് കൂടുതല്‍.
കെആര്‍ പുരം, ബയ്യപ്പനഹള്ളി, തുമക്കൂരു, ബാനസവാടി, കര്‍മലാരാം, കന്റോണ്‍മെന്റ് മേഖലകളിലാണ് കൂടുതല്‍ കേസുകള്‍ റജിസ്റ്റര്‍ ചെയ്തിരിക്കുന്നത്.
നേരത്തെ രാത്രിയിലാണ് കൂടുതല്‍ കല്ലേറ് ഉണ്ടായിരുന്നതെങ്കിലും ഇപ്പോള്‍ പകല്‍ സമയങ്ങളിലും കല്ലേറിന് കുറവില്ല. റെയില്‍വേ ട്രാക്കുകള്‍ കേന്ദ്രീകരിച്ചുള്ള ലഹരിമാഫിയ സംഘങ്ങളുടെ പങ്കും റെയില്‍വേ സുരക്ഷ സേന (ആര്‍പിഎഫ്) പരിശോധിക്കുന്നുണ്ട്. സമാനമായ സംഭവങ്ങളില്‍ നേരത്തെ ഇത്തരം സംഘങ്ങളില്‍പെട്ടവരെ പിടികൂടിയിരുന്നു.