മഹാരാഷ്ട്രയിലെ വോട്ടര്‍മാര്‍ക്ക് നന്ദി അറിയിച്ച് പ്രധാനമന്ത്രി നരേന്ദ്ര മോദി. മഹാരാഷ്ട്ര നിയമസഭ തിരഞ്ഞെടുപ്പിലെ ബിജെപി നേതൃത്വത്തിലുള്ള എന്‍ഡിഎ സഖ്യത്തിന്റെ വിജയത്തിന് പിന്നാലെയാണ് സംസ്ഥാനത്തെ വോട്ടര്‍മാര്‍ക്ക് മോദി നന്ദി അറിയിച്ചത്. തന്റെ എക്‌സ് പേജിലൂടെയായിരുന്നു പ്രധാനമന്ത്രിയുടെ പ്രതികരണം.
വികസനവും സദ്ഭരണവും വിജയിച്ചെന്നും പ്രധാനമന്ത്രി എക്‌സില്‍ കുറിച്ചു. വികസനം വിജയിക്കുന്നു, സദ്ഭരണം വിജയിക്കുന്നു. തങ്ങള്‍ ഇനിയും ഒരുമിച്ച് ഉയരത്തില്‍ കുതിക്കും. എന്‍ഡിഎയ്ക്ക് ചരിത്രപരമായ വിജയം നല്‍കിയതില്‍ മഹാരാഷ്ട്രയിലെ എന്റെ സഹോദരി സഹോദരന്മാര്‍ക്കും പ്രത്യേകിച്ച് സംസ്ഥാനത്തെ യുവജനങ്ങള്‍ക്കും സ്ത്രീകള്‍ക്കും ഹൃദയം നിറഞ്ഞ നന്ദിയെന്നും മോദി കുറിച്ചു.
മഹാരാഷ്ട്രയുടെ പുരോഗതിക്കായി ഞങ്ങള്‍ തുടര്‍ന്നും പ്രവര്‍ത്തിക്കുമെന്ന് ഞാന്‍ ജനങ്ങള്‍ക്ക് ഉറപ്പ് നല്‍കുന്നു. ജയ് മഹാരാഷ്ട്ര എന്നിങ്ങനെയാണ് മോദിയുടെ കുറിപ്പ് അവസാനിക്കുന്നത്.