ബംഗാളിനെതിരെ വിവാദപരാമര്‍ശവുമായി മേഘാലയ ഗവര്‍ണര്‍ തഥാഗത് റോയ്. ബംഗാളികള്‍ ഇന്ന് തറ തുടയ്ക്കുന്നവരും ബാര്‍ ഡാന്‍സര്‍മാരുമായി അധഃപതിച്ചെന്നും ബംഗാളിന്റെ മഹത്വം പഴങ്കഥയാണെന്നും തഥാഗത് റോയ് ട്വീറ്റ് ചെയ്തു. ഹിന്ദിയോട് ബംഗാളികള്‍ എതിര്‍പ്പ് പ്രകടിപ്പിക്കുന്നത് രാഷ്ട്രീയകാരണങ്ങളാലാണെന്നും അദ്ദേഹം ട്വീറ്റ് ചെയ്തു. മൂന്നു ഭാഷകള്‍ പാഠ്യപദ്ധതിയില്‍ ഉള്‍പ്പെടുത്തണമെന്ന കേന്ദ്ര നയത്തിനെതിരെ ബംഗാള്‍ ഉള്‍പ്പടെയുള്ള ചില സംസ്ഥാനങ്ങളുടെ പ്രതിഷേധത്തിന്റെ പശ്ചാത്തലത്തിലാണ് തഥാഗത് റോയിയുടെ പരാമര്‍ശം.
രാഷ്ട്രീയകാരണങ്ങളാണ് ഹിന്ദിക്കെതിരായ പ്രതിഷേധങ്ങള്‍ക്കു പിന്നില്‍. ഹിന്ദി സംസാരഭാഷയല്ലാത്ത സംസ്ഥാനങ്ങളാണ് മഹാരാഷ്ട്രയും ഒഡിഷയും. പക്ഷേ, അവരൊന്നും ഹിന്ദിയെ എതിര്‍ക്കുന്നില്ല. വിദ്യാസാഗര്‍, വിവേകാനന്ദന്‍, രവീന്ദ്രനാഥ ടാഗോര്‍, നേതാജി സുഭാഷ് ചന്ദ്രബോസ് എന്നിവരുടെയൊക്കെ നാടാണ് ബംഗാള്‍. പിന്നെന്തിനാണ് ഹിന്ദി പഠിക്കുന്നത് എന്നാണ് ബംഗാളികളുടെ വാദം.
ഹിന്ദി പഠനവും ഈ മഹാന്മാരും തമ്മിലെന്താണ് ബന്ധമെന്നും അദ്ദേഹം ചോദിക്കുന്നു. അവരുടെ കാലമൊക്കെ കഴിഞ്ഞെന്നും ബംഗാളിന്റെ മഹത്വം പഴങ്കഥയായെന്നും ആരാണ് ബംഗാളികള്‍ക്ക് പറഞ്ഞു കൊടുക്കുകയെന്നും തഥാഗത് റോയി ട്വീറ്റ് ചെയ്തു.
ബംഗാളി യുവാക്കള്‍ ഹരിയാന മുതല്‍ കേരളം വരെ വീടുകളില്‍ തറ തുടയ്ക്കുകയാണ്. ബംഗാളി പെണ്‍കുട്ടികളാവട്ടെ മുംബൈയിലെ ബാറുകളില്‍ ഡാന്‍സ് ചെയ്യുകയാണെന്നും തഥാഗത് റോയ് അഭിപ്രായപ്പെട്ടു. ട്വീറ്റിനെ അനുകൂലിച്ചും എതിര്‍ത്തും നിരവധി പേരാണ് രംഗത്തെത്തിയിരിക്കുന്നത്.